काठमाडौ । दालमोठ खाँदा होस् पु¥याउनुहोस् है ! केहि उद्योगले कुहिएको चाउचाउ, किरा परेका चना र दालका साथै अखाद्य पदार्थबाट तयार पारिएका दालमोठ बजारमा पठाउने गरेको रहस्य राजधानी काठमाडौबाटै खुलासा भएको छ ।
काठमाडौको गौरीघाटसँगैको कुमारीगालमा उपहार दालमोठ उद्योगको अनुगमनका क्रममा दालमोठ बनाउन प्रयोग गरिने सबै खाद्यवस्तु अखाद्य भेटिएका छन् । दालमोठ बनाउन प्रयोग गरिने मुख्य कच्चा पदार्थ चना र दालमा किरा भेटिएको छ ।
अनुगमनका क्रममा उद्योगको गोदाममा फोहोर मिश्रित ढुसी परेका चाउचाउका बोरा तथा ढलको पानीजस्तो तेलमा पकाउने गरेको फेला परेको हो ।
उद्योगमा फोहोर नै फोहोर भेटिएपछि दालमोठका लागि प्रयोग हुने कञ्चा पदार्थ सबै अखाद्य फेला परेपछि सरकारी अधिकारीहरुले उद्योगीहरुले दालमोठका नाममा उपभोक्ताहरुलाई विष बेचिरहेको बताएका छन् ।
खाद्य प्रविधि तथा गुण नियन्त्रण विभाग, काठमाडौ जिल्ला प्रशासन कार्यालय, उपभोक्ता अधिकारकर्मी प्रहरी र संचारकर्मीको टोलीले शनिबार दालमोठ उद्योगमा गरेको अनुगमनबाट चाउचाउ उद्योगहरुले फाल्नका लागि ठिक्क पारेका अखाद्य चाउचाउलाई प्रशोधन गरेर दालमोठ बनाउने गरिएको तथ्य खुलेको प्रहरी नायव उपरिक्षक नवराज कार्कीले वताए ।
उद्योगले कीरा परेका दाल र ढुसी परेका चाउचाउलाई लेदोजस्तो तेलमा भुटेर उपहार र ओबेद नाममा बजारमा दालमोठ पठाउने गरेको पाइएपछि अनुगमन टोलीले उद्योगमा शील लगाएको छ ।
अखाद्य वस्तु बजारमा पठाएर उपभोक्ताको स्वास्थ्यमाथि खेलवाड गर्दै आएको प्रमाण देख्दा देख्दै पनि प्रशासनले भने उद्योग संचालक सुनिल केशरीलाई नियन्त्रणमा लिएको छैन ।
काठमाडौ जिल्ला प्रशासन कार्यालयले उद्योग संचालक केशरीलाई आइतबार बयानका लागि बोलाएको छ । केशरीले उपहार दालमोठ उद्योग संचालन गरेको तीन वर्ष भएको छ ।
वि.सं.२०७२ चैत २७ शनिवार १७:१५ मा प्रकाशित
