गोरखा। भूकम्प अति प्रभावित गोरखाका ६ गाविसका बासिन्दाले नुन खान नपाएको गुनासोसहित प्रशासनमा निवेदन दिएका छन् । साल्ट ट्रेडिङ कर्पोरेसनले बिक्री गर्ने सहुलियत मूल्यको नुन उपलब्ध गराइदिन माग गर्दै उनीहरूले निवेदन दिएका हुन् ।
‘१ किलो नुनको एक सय रुपैयाँभन्दा बढी पर्छ,’ उहियाका सन्तमान गुरुङले भने, ‘त्यही पनि भनेको बेलामा किनेर खान पाइँदैन ।’ नुन महँगो र अभाव भएपछि लाप्राक, गुम्दा, लापु, उहिया, केरौंजा र काशीगाउँका स्थानीयवासीले निवेदन दिएका हुन् ।
प्रमुख जिल्ला अधिकारी बलदेव गौतमले उनीहरूको निवेदन सिफारिस गरेर साल्ट ट्रेडिङमा पठाइएको बताए । ‘बाटो सजिलो छैन । त्यसैले साल्ट ट्रेडिङले त्यता सहुलियतको नुन पठाउन समस्या भएको जानकारी गराएको छ,’ उनले भने । भूकम्पपछिको पहिरोले बाटो अवरुद्ध हुँदा उत्तरी दुर्गम गाविसमा खाद्यान्न, नुनतेल र दैनिक उपभोग्य सामग्री अभाव भएको कान्तिपुर दैनिकमा खबर छ ।
०१ फागुन २०७२
वि.सं.२०७२ फागुन १ शनिवार १०:४४ मा प्रकाशित
