काठमाडौं । अख्तियार दुरुपयोग अनुसन्धान आयोगले बिपी कोइराला मेमोरियल क्यान्सर अस्पतालका अध्यक्ष डा.भक्तमान श्रेष्ठले पदमा रहँदा अकुत सम्पत्ति आर्जन गरेको अभियोगमा भ्रष्टाचार मुद्दा दायर गरेको छ।
अख्तियारले पदको दुरुपयोग गरी एक करोड ६७ लाख ५७ हजार १ सय १३ रुपैया सम्पत्ति गैरकानुनी रुपमा आर्जन गरेकको भन्दै मुद्दा दायर गरेको हो। श्रेष्ठले अस्पतालमा सेवा प्रवेश गरेदेखि नै सार्वजनिक पदमा बहाल रहँदा आफ्नो पदीय जिम्मेवारीको दुरुपयोग एवं भ्रष्टाचार गरी गैर–कानूनी रुपबाट सम्पत्ति आर्जन गरी भ्रष्टाचार निवारण ऐन, २०५९ विपरितको काम गरेको अख्तियारको आरोप पत्रमा उल्लेख छ।
श्रेष्ठसँग उनले आर्जन गरेको सम्पत्ति विगो कायम गरी असुल हुनुपर्ने अख्तियारको आरोप पत्रमा उल्लेख छ । अपहरणमा परी ठूलो रकम फिरौती बुझाएर मुक्त भएको चर्चामा आएका श्रेष्ठलाई अख्तियारले आइतबार अकुत सम्पत्ति आर्जनमा मुद्दा दायर गरेको हो।
क्यान्सर अस्पताल चितवनमका प्रमुख डाक्टर श्रेष्ठले अस्पतालवाट अवैध सम्पत्ति आर्जन गरेको दाबी गरिएको छ । श्रेष्ठलाई ऐनको दफा २० को उपदफा बमोजिम जरिवाना र कैद सजाय हुन साथै स्रोत पुष्टि हुन नसकेको सम्पत्ति जफत हुनुपर्ने अख्तियारको आरोप पत्रमा उल्लेख छ । अख्तियारले अवैध सम्पत्ति आर्जन गरी लुकाउने काममा संलग्न रहेको भन्दै श्रेष्ठकी श्रीमती शिलु श्रेष्ठलाई समेत प्रतिवादी कायम गरेको छ ।
नागरिक/३ फागुन २०७२
वि.सं.२०७२ फागुन ३ सोमवार ०७:१६ मा प्रकाशित
