मुगु । मुगुका किसानको आम्दानीको मुख्य स्रोत स्याउ हो । तर त्यही स्याउ रुख मै कुहिन थाले पछि किसानहरुको चिन्ता बढ्दै गएको छ । वर्षाले भत्किएका सडकको मर्मत नहुँदा निकासीमा समस्या भई स्याउ रुखमै कुहिन थालेको हो ।
लगातारको वर्षाले पहिरो गएपछि गमगढी–नाग्म सडक खण्ड अवरुद्ध छ । तर, अवरुद्ध सडक खुलाउने प्रयास भएका छैनन् । सडक नबन्दा किसान पाकेको स्याउ टिप्न पाएका छैनन् । सडक अवरुद्ध भएपछि किसानहरुलाई पाकेको स्याउ बजारसम्म पठाउन समस्या भएको छ ।
जिल्ला कृषि विकास कार्यालयका बागबानी शाखाका प्राविधिक सहायक तेजविक्रम मल्लले बताएका अनुसार बाटो नहुँदा पाकेका स्याउ धमाधम कुहिन थालेको छ ।
मुगुको स्याउ नेपालगञ्ज, सुर्खेत र काठमाडौंका बजारसम्म पुग्ने गरेका छन् ।यस वर्ष मुगुमा अघिल्ला वर्षको तुलनामा बढी स्याउ फले पनि सडक अवरुद्ध हुँदा बोटमा फलेको स्याउँले बेच्न नपाउँदा किसान चिन्तित भएका छन् ।
प्रकाशित मितिः २०७४ भाद्र १४
वि.सं.२०७४ भदौ १४ बुधवार १०:३५ मा प्रकाशित