काठमाडौं । फेब्रुरअरी १४ तारेखमा पर्ने भ्यालेन्टाइन डे अर्थात प्रणय दिवस नजिकिंदै गर्दा गुलावको अभाव भएपछी यो वर्ष भारतबाट एकलाख वटा रातो गुलाफ ल्याइने भएको छ । गर्मी समयमा नेपालमा उत्पादन हुने फूलले नै माग पूरा गर्ने भए पनि जाडोको समयभर बढी मात्रामा रातो गुलाफ प्रयोग हुनेभएकाले भारतबाट फूल आयात गर्न लागिएको फ्लोरीकल्चर एसोसिएसनका अध्यक्ष लोकनाथ गैरेले जानकारी दिए । आयात गर्न लागिएको एकलाख फूलको मूल्य ३० लाखदेखि ४० लाख रुपैयाँ पर्छ। फेब्रुरअरी १४ तारेखको दिन प्रेमी प्रेमिकाले उपहारको रुपमा एक आपसमा रातो गुलाफ आदान प्रदान गर्ने गर्दछन् । हाल नेपालमा रातो गुलाफ दैनिक पाँच हजारदेखि सात हजार आवश्यक पर्ने उनले बताए । गर्मीको समयमा स्वदेशी उत्पादनले र जाडोको समयमा भारतबाट आयात गरी माग पूरा गर्ने गरिएको छ । फूल आगामी मङगलबारसम्म आइसक्नेछ। गतवर्ष पनि प्रणय दिवसका लागि भारतबाट एक लाख वटा नै रातो गुलाफ ल्याइएको गैरेले बताए । बर्सेनी आयात कम गर्ने भनिएपनि भूकम्पका कारण यसवर्ष फूलखेती त्यति फस्टाउन नसकेकाले गत वर्षको जतिनै फूल आयात गर्नु परेको अध्यक्ष गैरेले बताए। नेपालमा वार्षिक चार करोड रुपैयाँ बराबरको फूलको आयात हुँदै आएको छ। विदेशबाट आयत गरिएको र स्वदेशमा नै उत्पादनभएको गरी एक अर्ब ३० करोडको फूलको वार्षिक कारोबार हुँदै आएको छ। रातो गुलाफको विशेषगरी काठमाडौँ उपत्यकाको तीनवटै जिल्ला, काभ्रेपलाञ्चोक र चितवनमा व्यावसायिक रुपमा खेती हुँदै आएको छ। २६ माघ २०७२
वि.सं.२०७२ माघ २६ मंगलवार १०:२७ मा प्रकाशित
