कञ्चनपुर । यहाँ मरेको कुखुराको मासु खाँदा ६ वर्षीया बालिकाको मृत्यु भएको छ उनका आमा र दाजु सिकिस्त भएका छन् ।
मरेको कुखुराको मासु खाँदा झलारी–पिपलाडी नगरपालिका–११ दीपनगर बस्ने ६ वर्षीया गोलमा विकको मृत्यु भएको हो। विककी आमा ३५ वर्षीया नन्दा र दाजु आठ वर्षीय निलम सिकिस्त छन्। दुबैजनाको झलारीस्थित ‘न्यू झलारी क्लिनिक’मा उपचार भइरहेको इलाका प्रहरी कार्यालय झलारीका प्रहरी निरीक्षक सुदाम रावलले जानकारी दिए।
बुधबार साँझ विक परिवारले बाटोमा भेटिएको मरेको कुखुरा पकाएर खाँदा उनीहरु विरामी परेका थिए। गोलमाको आज घरमै मृत्यु भएपछि उनकी आमा र दाजुलाई उपचारका लागि झलारीस्थित क्लिनिकमा पुर्याइएको छ। उनीहरुको अवस्था गम्भीर रहेको प्रहरी निरीक्षक रावलले बताए।
मरेको कुखुरा खाएपछि तीनजनालाई पखाला लागे पनि घरमै सामान्य उपचार गर्दै आएका थिए। बालिकाको शव परीक्षणका लागि महाकाली अञ्चल अस्पताल पठाउने तयारी गरिरहेको उनले बताए। रासस
माघ २२, २०७२/ १.३०
वि.सं.२०७२ माघ २२ शुक्रवार १३:४७ मा प्रकाशित
