काठमाडौं। सानिमा बैंकले चालु आर्थिक वर्षको दोस्रो त्रैमासिक अवधिसम्ममा ४० करोड ८० लाख रुपैयाँ नाफा गरेको छ।
बैंकको यो नाफा गत वर्षको यो अधविको तुलनामा ४६ प्रतिशतले धेरै हो। गत वर्षको पुस मसान्तसम्ममा बैंकले २७ करोड रुपैयाँ खुद नाफा गरेको थियो। तीन अर्ब ६ करोड रुपैयाँ चुक्ता पुँजी रहेको बैंकको रिजर्वमा ७७ करोड रुपैयाँ रहेको छ। बैंकले यो अवधिमा ३९ अर्ब रुपैयाँ निक्षेप संकलन गरी ३३ अर्ब रुपैयाँ कर्जा प्रवाह गरेको जनाएको छ।
गत वर्षको तुलनामा बैंकको निक्षेप ९ अर्बले र कर्जा ८ अर्ब रुपैयाँले बढेको छ। बैंकको ब्याज आम्दानी गत वर्षकै समान छ भने अन्य सञ्चालन आम्दानी तीन करोड रुपैयाँले बढेको छ। यो अवधिमा बैंकको प्रोभिजन रकम थोरै बढेको छ भने खराब कर्जार अनुपात गत वर्षकै समान रहेको छ।
यो अवधिमा बैंकको प्रति सेयर आम्दानी २५ रुपैयाँ ६ पैसा रहेको छ। यो रकम गत वर्षको भन्दा थोरै बढि हो। गत वर्ष २४ रुपैयाँ ६४ पैसा रहेको थियो।
प्रकाशित मिति २०७२ माघ १२ मंगलबार
वि.सं.२०७२ माघ १२ मंगलवार १८:३६ मा प्रकाशित
