काठमाडौं । इन्धन कालोबजारीमा सघाएको भन्दै विवादमा तानिएको नेपाल आयल निगमले अवैध पम्पलाई तेल दिइरहेको खुलेको छ । अघोषित नाकाबन्दीपछि पाँच महिनायता बिनादर्ता सञ्चालनमा रहेको कीर्तिपुरस्थित आरती सप्लायर्सलाई निगमले तेल उपलब्ध गराउँदै आएको खुलासा भएको हो ।
महानगरीय प्रहरी अपराध महाशाखाले बुधबार पम्प सञ्चालक दिनेश महर्जनलाई पक्राउ गरेपछि इन्धन कालोबजारीमा निगम पदाधिकारीको मिलेमतो छर्लंग भएको छ । नागरिक दैनिकमा खबर छ ।
महर्जनमाथि अवैध प्रक्रियामार्फत भित्र्याएको तेल घरमा भण्डारण गरी नोजल नै राखेर महँगो मूल्यमा बेचेको अभियोग छ। प्रहरीले उनको घरबाट कालोबजारी गर्न राखिएको १५ सय लिटर पेट्रोलसमेत बरामद गरेको छ ।
नाकाबन्दीसँगै अभाव चुलिएको मौका छोपी महँगो मूल्यमा इन्धन बेच्ने नियतले खोलिएको उक्त सप्लायर्सलाई सञ्चालकसँगको मिलेमतोमा निगम पदाधिकारीबाटै तेल उपलब्ध गराइँदै आएको महाशाखास्रोतले जनाएको छ ।
महाशाखा प्रमुख सर्वेन्द्र खनालका अनुसार सुरुमा चितवन, ठोरीबाट तस्करीको पेट्रोल ल्याएर प्रतिलिटर ५ सय रुपैयाँसम्ममा बिक्री गरेका महर्जनले निगमको थानकोट डिपोबाटसमेत तेल लिएको बयान दिएका छन् ।
‘प्रारम्भिक अनुसन्धानमा आयल निगमबाट समेत तेल ल्याउने गरेको देखिएको छ, उनले कुन आधारमा तेल पाए, अनुसन्धान सुरु गरेका छौं,’ उनले भने ।
आरती सप्लायर्सले महँगो मूल्यमा इन्धन बेचेको गोप्य सूचना पाएपछि महाशाखाले छापा मारेको थियो । महाशाखाको टोली बुधबार सप्लायर्स पुग्दा नोजलबाटै धमाधम इन्धन बिक्री भइरहेको थियो । नागरिक दैनिकमा खबर छ
प्रकाशित /२०७२ फाल्गुन ७
वि.सं.२०७२ फागुन ७ शुक्रवार ११:५४ मा प्रकाशित
