काठमाडौँ । मुलुकको आर्थिक समृद्धिका लागि लगानीमैत्री वातावरण सिर्जना गर्ने गरी सरकारले ‘औद्योगिक व्यवसाय ऐन’ ल्याउने तयारी गरेको छ ।
करिब २४ वर्षअघिको ऐन समयसापेक्ष उद्योगीव्यवसायीमैत्री नभएकाले आर्थिक ऐनको छाताका रुपमा औद्योगिक व्यवसाय ऐन ल्याउन लागिएको हो । विसं २०६७ को औद्योगिक नीतिसँग नबाझिने गरी नयाँ औद्योगिक व्यवसाय ऐन ल्याउन लागिएको उद्योग मन्त्रालयले जनाएको छ ।
यसअघि २०४९ मा ल्याइएको औद्योगिक व्यवसाय ऐन समयक्रमसँगै अपूर्ण रहेको जनाउँदै नयाँ ऐन ल्याउन सरोकार भएकाहरुसँग छलफल बढाइएको छ । उक्त ऐनसम्बन्धी विधेयक २०७१ मा संसद्मा पेस भए पनि अझै कानुनी रुप लिएको छैन ।
औद्योगिक व्यवसायसम्बन्धी कानुन संशोधन र एकीकरण गर्न बनेका विधेयक सम्बन्धमा दफाबार छलफल गरी पूर्ण कानुन बनाउन व्यवस्थापिका–संसद्, उद्योग वाणिज्य तथा उपभोक्ता हित संरक्षण समितिको बैठकमा आजदेखि छलफल सुरु भएको छ ।
बैठकमा उद्योगमन्त्री सोमप्रसाद पाण्डेयले मुलुकको अर्थतन्त्रलाई सुदृढ ढङ्गले अघि बढाउन र लगानीमैत्री वातावरण सिर्जना गर्ने उद्देश्यका साथ औद्योगिक व्यवसाय ऐन ल्याउन लागिएको बताए ।
प्रकाशितः २०७३ साउन १५
वि.सं.२०७३ साउन १५ शनिवार १२:४९ मा प्रकाशित
