काठमाडौं । तपाईले आफ्नो सेयर बेचेको तीन दिनभित्र त्यसको भुक्तानी पाउनुभएको छैन रु यदि छैन भने तपाईले पुँजी बजारको नियामक नेपाल धितोपत्र बोर्डको हटलाइन नम्बरमा फोन गरेर उजुरी दिन सक्नुहुने छ ।
‘टी प्लस थ्री’ अर्थात् व्यापार भएको तेस्रो दिनसम्ममा भुक्तानी नपाएको भन्ने गुनासो आएपछि त्यसको सुनुवाई गर्न बोर्डले हटलाइन सेवा सुरु गरेको हो ।
अब कुनै पनि सेयर बिक्रीकर्ताले सेयर बेचेको तेस्रो दिनमा भुक्तानी नपाए बोर्डको हलाइन नम्बर ५०००१०२ मा फोन गरेर उजुरी दिन सक्नेछन् ।
धितोपत्र बोर्डले सेयर कारोबारलाई पूर्णरुपमा डिम्याट (विद्युतीय अर्थात अभौतिक) बनाइसकेको छ । पूर्णरुपमा डिम्याट भएपछि सेयर कारोबारको राफसाफ ३ दिनभित्रै हुनुपर्ने व्यवस्था छ । अभौतिक कारोबार हुँदा सेयर बेचेको पैसा भुक्तानी लिन महिनौं लाग्थ्यो ।
‘सामान्यतया ब्रोकरले नै भुक्तानीमा ढिालाइ गर्ने गरेका छन्, कहिलेकाहीँ लगानीकर्ताले पनि ढिलाइ गरेको हुन्छ,’ बोर्डका प्रवक्ता निरज गिरीले भने, ‘ढिलो गर्नेलाई पहिलो चरणमा सचेत गराउँछौ । सचेत गर्दा नमान्नेलाई सस्पेन्स गर्छौं र जरिवाना तिराउँछौं ।’
प्रकाशितः २०७३ साउन १६
वि.सं.२०७३ साउन १६ आइतवार १०:२९ मा प्रकाशित
