पाल्पा । दूध बिक्री गरेर राम्रो आम्दानी गर्ने उद्देश्य बोकेका चाँपाकोटका किसान दूध बिक्री नहुँदा समस्यामा परेका छन् ।
बिस्तारै बढ्दै गएको चाँपाकोट बजारलाई ध्यानमा राख्दै व्यावसायिक पशुपालनमा लागेका किसानले उत्पादित दूध बजारमा बिक्री गर्न सकेका छैनन् ।
दूध उत्पादनकै लागि यहाँ गण्डकीबँेसी गाईपालन समूह गठन गरेर यहाँका ५० घरपरिवारका किसानले आम्दानीको मुख्य स्रोत नै पशुपालन व्यवसाय अपनाएका छन् । यहाँ उत्पादित दूध किसानले सङ्कलन केन्द्रमा जम्मा गरेर बिक्री गर्ने व्यवस्था मिलाई पशुपालन व्यवसायमा लागेका हुन् ।
सङ्कलन केन्द्रमा दैनिक दुई २०० देखि ३०० लिसम्म दूध जम्मा भएकामा यहाँको बजारमा २० देखि ३० लि मात्र दूध खपत हुने गरेको समूहका अध्यक्ष गोपीचन्द्र भट्टराईले बताउनुभयो ।
समुदायमा गाईको महत्व थाहा नहुनु तथा गाईको दूध खाए पिनास रोग लाग्छ भन्ने पुरानो सोचाइले यहाँका उपभोक्ताले गाईको दूध खरिद नगर्ने गरेको उहाँले बताउनुभयो ।
यहाँ उत्पादित दूध अन्यत्र लैजान सक्ने व्यवस्था नभएकाले दूध बिक्रीमा समस्या परेको किसान शेषकान्त भण्डारीले बताउनुभयो । गत वर्ष गाईपालन समूह गठन गरी समूहमा आबद्ध किसानले दुईदेखि पन्ध्र वटासम्म जर्सी र होलस्टिन जातका गाई पाल्दै आएको स्थानीयवासी रामचन्द्र भट्टराईले बताउनुभयो ।
एक किसानले पाँचदेखि ४० लिसम्म दूध उत्पादन गर्ने गरेका छन् । बजारको विकास र विस्तार नभएका कारणले यहाँ उत्पादित दूधले बजार पाउन नसकेको हो ।
२५ साउन २०७३, १२।००
वि.सं.२०७३ साउन २५ मंगलवार १२:१९ मा प्रकाशित