काठमाडौ । ब्राजिलको फुटबल टिमले ओलम्पिकमा स्वर्ण पदक जितेको छ । ओलम्पिकमा अहिलेसम्म स्वर्ण जित्न नसकेको ब्राजिलले पेनाल्टी सुट आउटमा जर्मनीलाई पाखा लगाउँदै ओलम्पिकमा इतिहाँस रचेको हो ।
आइतबार बिहान ब्राजिलको माराकाना रंगशालमा भएको खेलको २७ औं मिनेटमा ब्राजिलले नेयमारको गोलबाट अग्रता लिएतापनि ५९ औं मिनेटमा जर्मनीको तर्फबाट म्याक्स मेइअरले गोल गर्दै खेल बराबरीमा ल्याएका थिए ।
९० मिनेटसम्म खेल १–१ को बराबरीमा रोकिएपछी थपिएको अतिरिक्त समयमापनि कुनै गोल हुन नसकेपछि खेल पेनाल्टी सुटआउटमा पुगेको थियो । पेनाल्टी सुटआउटको एउटा बल ब्राजिलका गोल रक्षक वेभर्टनले रोकेपछी नेयमारले अन्तिम पेनाल्टी पनि गोलमा परिणत गरेका थिए । यसरी ब्राजीलको जित सम्भव भएको हो ।
उक्त जितले सन् २०१४ को विश्वकपमा ब्राजीलले जर्मनीसँग ७–१ ले हारेको बदला समेत लिएको छ ।
प्रकाशितः २०७३ भदौ ५
वि.सं.२०७३ भदौ ५ आइतवार १०:४५ मा प्रकाशित
