काठमाडौ । पूर्णिमा विकास बैंकले आज अर्थात् सोमबार देखि २५ प्रतिशत हकप्रद सेयर बिक्री खुला गरेको छ । बैंकले ४ः१ अनुपातमा १०० रुपैयाँ दरको ८ लाख ८० हजार ९६२.८२ कित्ता हकप्रद सेयर बिक्री खुला गरेको हो ।
उक्त हकप्रद सेयर साउन २२ गतेसम्म भर्न पाइनेछ । यसका लागि जेठ १५ गतेसम्म कायम रहेका सेयरधनीले मात्र आवेदन दिन सक्नेछन् । पूर्णिमाको हकप्रदमा सिद्धार्थ क्यापिटलले बिक्री प्रबन्धकको काम गरेको छ ।
लगानीकर्ताले सिद्धार्थ क्यापिटल लिमिटेड नारायणचौर नक्साल र सिद्धार्थ बैंकको देशभरिका शाखा कार्यालयबाट आवेदन दिन सकिनेछ । यसैगरी, पूर्णिमा विकास बैंकको भैरहवा, रुपन्देहीलगायत यसका सम्पूर्ण शाखा कार्यालयबाट पनि आवेदन फारम भर्न र बुझाउन सकिनेछ । हाल पूर्णिमाको चुक्ता पुँजी ३५ करोड २३ लाख ८५ हजार १३१.६७ रुपैयाँ छ । हकप्रद बाँडफाँटपछि बैंकको चुक्ता पुँजी ४४ करोड ४ लाख ८१ हजार ४१४ रुपैयाँ पुग्नेछ ।
यता कावेली विकास बैंकको दुई बराबर एकको अनुपातमा अर्थात ५० प्रतिशत हकप्रद निष्काशन हुने भएको छ । बैंकलाई हकप्रद निष्काशनको लागि नियामक निकाय धितोपत्र बोर्डले असार १८ गते अनुमति प्रदान गरेको छ ।
बैंकले सय रुपैयाँ अंकित मूल्यमा तीन करोड ५० लाख ८८ हजार रुपैयाँ बराबरको तीन लाख ५० हजार आठ सय ८० कित्ता शेयर निष्काशन गर्ने भएको हो । बैंकले हकप्रद शेयर निष्काशनका लागि ग्लोबल आईएमई क्यापिटल लिमिटेडलाई शेयर निष्काशन तथा बिक्री प्रबन्धकमा नियुक्त गरेको छ ।
५० प्रतिशत हकप्रद बिक्रीपश्चात बैंकको चुक्तापूँजी करिब दश करोड ५० लाख रुपैयाँँ पुग्नेछ ।
प्रकाशित मितिः २०७४ असार १९
वि.सं.२०७४ असार १९ सोमवार १४:१० मा प्रकाशित
