काठमाडौ । सानिमा हाइड्रो समूहको मुख्य लगानी रहेको १४.३ मेगावाटको माथिल्लो मैलुङ जलविद्युत आयोजनामा २ बैंकले १ अर्ब ८७ करोड ५० लाख रुपैयाँ लगानी गर्ने भएका छन् । रसुवामा निर्माण हुने आयोजनामा सिद्धार्थ बैंक लिमिटेडको अगुवाइमा नेपाल एसविआई बैंकले ऋण लगानी गर्न लागेक हो ।
बैंक र सानिमा हाइड्रो समूहले गत भदौ १९ गते ऋण लगानी सम्झौतामा हस्ताक्षर गरेको संचालक सुबर्णदास श्रेष्ठले बताए । श्रेष्ठका अनुसार कुल लगानीको ७५ प्रतिशत ऋण लगानी बैंकहरुले गर्दैछन् । २५ प्रतिशत स्वपुँजी लगानी रहने छ । आयोजनामा वित्तीय व्यवस्थापनको जोहो भइसकेकाले निर्माण सुरु हुन लागेको उनले बताए ।
साढे २ वर्षभित्रमा आयोजना पूरा गरेर २०७७ साल असारबाट विद्युत उत्पादन गर्ने लक्ष्य राखिएको छ । निर्माण पूरा भएपछि आयोजनाले वार्षिकरूपमा ७ करोड ९६ लाख ७० हजार ४ सय ८३ किलोवाट घन्टा विद्युत उत्पादन गरी नेपाल विद्युत प्राधिकरणलाई उपलब्ध गराउने छ । सानिमा हाइड्रो समुहले माथिल्लो मैलुङसहित ५४ मेगावाटको मध्यतमोर र २८.१ मेगावाटको तल्लो लिखु जलविद्युत आयोजना पनि यसै वर्ष निर्माणमा लैजाँदैछ ।
२.६ मेगावाटको सुनकोसी, २२ मेगावाटको सानिमा माई र ७ मेगावाटको माइ क्यासकेट संचालनमा छन् ।उर्जाखबरबाट
प्रकाशित मितिः २०७४ असो २
वि.सं.२०७४ असोज २ सोमवार १०:१६ मा प्रकाशित