काठमाडौ । बेष्ट फाइनान्सले १२५ प्रतिशत हकप्रद भर्ने म्याद १५ दिन थप गरेको छ । फाइनान्सले सुरुमा भदौ २७ देखि असोज ३० गते सम्मका लागि १ः१.२५ अनुपातमा हकप्रद सेयर बिक्री खुला गरेको थियो ।
तर यो अवधिमा दसैैंको लामो बिदा परेकाले लगानीकर्ताको आग्रहमा म्याद थप गरेको फाइनान्सले जनाएको छ । यसआधारमा अब बेष्टको हकप्रद कात्तिक १४ गतेसम्म भर्न सकिनेछ । यस फाइनान्सले १६ लाख ५२ हजार ८५० कित्ता हकप्रद सेयर बिक्रीमा ल्याएको हो । साउन २५ गतेसम्म कायम रहेका सेयरधनीले मात्र यो हकप्रदमा आवेदन दिन सक्नेछन् । जनरल फाइनान्सबाट केही दिनअघि मात्र नाम परिवर्तन गरेर बेस्ट फाइनान्स बनाइएको हो ।
लगानीकर्ताले बिक्री प्रबन्धक ग्लोबल आइएमई क्यापिटल लिमिटेड, राष्ट्रिय नाचघर जमल काठमाडौ तथा बेष्ट फाइनान्स (साबिकको जनरल फाइनान्स) मुख्य कार्यालय चाबहिल र शाखा कार्यालय पाको न्यूरोड, काठमाडौबाट आवेदन दिन सक्नेछन् ।
त्यसैगरी, ग्लोबल आइएमई बैंकको आदर्शनगर– १३ वीरगञ्ज, सहिद चोक नारायणघाट, पृथ्वीचोक कास्की, लोेकतान्त्रिक चोक बागलुङ, त्रिभुवन चोक नेपालगञ्ज र बिपि चोक बुटवलबाट पनि आवेदन दिन सक्नेछन् ।
यता समिट माइक्रोफाइनान्सको १०० प्रतिशत हकप्रद सेयर भर्ने म्याद बुधबार सकिंदैछ । यसआधारमा समिटको हकप्रद भर्न अर्ब ३ दिनमात्र बाँकी रहेको छ । कम्पनीले भदौ २९ गतेदेखि १ः१ अनुपातमा १०० रुपैयाँ अंकित मूल्यको ७ लाख २५ हजार कित्ता सेयर निष्काशन गरेको हो । यसमा भदौ ८ गतेसम्म कायम रहेका सेयरधनीले मात्र आवेदन दिन सक्नेछन् । बिक्री प्रबन्धक सानिमा क्यापिटल लिमिटेड नारायणचौर नक्साल काठमाडौ र समिट माइक्रोफाइनान्सको केन्द्रीय कार्यालय बिर्तामोड ७, झापासहित यसका अधिकांश शाखा कार्यालयबाट हकप्रद सेयरमा आवेदन दिन सकिनेछ । त्यसैगरी, सानिमा बैंकको धनगढी, नेपालगञ्ज, पोखरा, भैरहवा, नारायणगढ, वीरगञ्ज र जनकपुर शाखा कार्यालयबाट पनि आवेदन दिन सकिनेछ ।
हाल समिटको चुक्ता पुँजी ७ करोड २५ लाख रुपैयाँ छ । कम्पनीले यो पुँजीको ३४.४८ प्रतिशत बोनस सेयर र १०.५२ प्रतिशत नगद लाभांश दिने घोषणा पनि गरेको छ । हकप्रद र बोनसपछि भने चुक्ता पुँजी १६ करोड ९९ लाख ९८ हजार रुपैयाँ पुग्नेछ ।
प्रकाशित मितिः २०७४ असोज ३०
वि.सं.२०७४ असोज ३० सोमवार ११:४८ मा प्रकाशित