काठमाडौ। कुटुमा कुटु सुपारी दाना’ गीतबाट चौतर्फी वाहवाही बटुलेको नेपाली चलचित्र ‘२ रुपैयाँ’ साइप्रसमा प्रदर्शन हुने भएको छ । निश्चल बस्नेत, आशिफ शाह, मिस तामाङ २०१२ सुमी मोक्तान लगायतको धमाकेदार अभिनयले भरिएको चलचित्र २ रुपैयाँलाई ओमकार महतो उर्फ ओमी सुरी, रोजिना जोशी र डिपेन भण्डारीको समूहले संयुक्त रुपमा साइप्रसमा प्रदर्शन गर्न लागेका हुन् ।
यही अक्टुवर ८ तारिख आइतबारका दिन साइप्रसको निकोसिया शहरको डाइनिसस थियटरमा बिहान ११स्३० बजे चलचित्र २ रुपैयाँ प्रदर्शन गर्न लागेको जानकारी आयोजकले गराएको छ । जन्मभूमीबाट टाढा रहेका नेपाली दिदीबहिनी तथा दाजुभाइहरुलाई महिनाको एक पल्ट भएपनि नेपाली चलचित्र देखाएर मनोरन्जन प्रदान गर्ने उद्धेश्यका साथ अक्टुवर महिनामा यो चलचित्रको प्रदर्शन गर्न लागिएको जानकारी आयोजकले गराएको छ ।
साइप्रसमा पनि नेपाली चलचित्रको प्रचारप्रसार गर्ने र यहाँ बसोबास गरिरहेका नेपालीहरुलाई सिनेमाहलसम्म पुर्याएर नेपाली कथानक चलचित्र देखाउने उद्धेश्यका साथ आफूहरुले २ रुपैयाँको प्रदर्शनको व्यवस्था मिलाएको समेत आयोजकको ठम्याई रहेको छ।
प्रकाशित मितिः २०७४ असोज २०
वि.सं.२०७४ असोज २० शुक्रवार १४:५८ मा प्रकाशित
