ट्राफिक प्रहरी अब सेवाग्राही मैत्री हुने भएको छ। सडकमा कार्यरत ट्राफिक प्रहरीले सभ्य भाषामा कर्तब्य पालना गर्दै जिब्रोको गरिमालाई पालना गर्नुपर्ने ट्राफिक प्रहरीका डिआजी जयबहादुर चन्दले बताए।
बिहीबार ललितपुरका ट्राफिक प्रहरीहरूलाई कक्षा लिँदै चन्दले सडक प्रयोग कर्तालाई सभ्य भएर व्यवहार गर्न अनुरोध गरेका छन्। नमस्कार गरेर चेकिङ सुरू गर्ने भन्दै उनले सकारात्मक सोच राखेर जिब्रोको बोलीमा मिठो गरिमा भन्ने भनाइलाई पालना गर्नुपर्ने बताए।
गल्ती गर्नेलाई पनि मुस्कान दिएर निजको गल्तीको बारेमा उसैलाई लाज लाग्ने तरिका अपनाउनु पर्ने चन्दले बताए। ‘चेकिङमा मात्र राम्रो व्यवहार गरेर हुन्न। हर समयमा राम्रो व्यवहार गर्नुपर्छ,’ उनले भने,‘ कारबाही मात्र गर्ने होइन जनचेतना पनि जगाउने काम गर्नुपर्छ।’
ट्राफिक पुलिस धैर्यवान हुनुपर्ने र सडक प्रयोगकर्ता रिसाएपनि आफू नम्र भएर कर्तब्य पालना गर्नुपर्ने उनले ट्राफिक प्रहरीमा अनुरोध गरेका छन्। कालो मुख लगाएर, रिसाएर गल्ती गर्नेलाई गाली गर्ने काम नगर्न उनले सबैलाई अनुरोध गरेका थिए।
ललितपुर ट्राफिक प्रहरीका प्रमुख सीताराम हाक्षेथुले नेपालमै पहिलो पल्ट यस्तो कार्यको सुरूआत ललितपुरबाट गरेकाले हामी सबै उत्सुक र दिएको निर्देशन पालना गर्न तयार रहेको बताए।
वि.सं.२०७२ असोज १४ बिहीवार १७:४३ मा प्रकाशित
