काठमाडौँ । प्रधानमन्त्री केपी शर्मा ओली राजकीय भारत भ्रमण पुरा गरेर स्वदेश फर्कने क्रममा भीभीआईपी फ्लाइट झण्डै एक घण्टा ढिला भएको बिषय छानविन गर्न संस्कृति पर्यटन तथा नागरिक उड्डयन मन्त्रालयले छानविन समिति बनाएको छ ।
नेपाल वायुसेवा निगमको आरए २०१ बाट बुधबार राति ८ः१० बजे त्रिभुवन अन्तराष्ट्रिय विमानस्थलमा ओर्लने तय भएको फ्लाइट एक घन्टा ढिला भएको थियो । प्रधानमन्त्री ओलीकै फ्लाइट ढिला भएपछि संस्कृति पर्यटन तथा नागरिक उड्डयन मन्त्रालयले सोको सत्य तथ्य छानविन गरेर कारवाही प्रक्रिया अगदुई बढाउन सहसचिव बुद्धिसागर लामिछानेको नेतृत्वमा चार सदस्यीय समिति बनाएको छ ।
समितिमा वायुसेवा निगमका निर्देशक जनकलाल कालाखेती र नेपाल नागरिक उड्डयन प्राधिकरणका उपनिर्देशक सुभास झा सदस्य र विमानस्थल फ्लाइट अपरेशन डिपार्टमेण्टका निर्देशक सुधीरकुमार चौधरीलाई सदस्य सचिव तोकिएको छ । वायुसेवा निगमको काम कारवाहीबाट उडान व्यवस्थापनमा लापरवाही हुन गएको भन्दै मन्त्रालयले समिति बनाएको संस्कृति पर्यटन तथा नागरिक उड्डयन मन्त्री आनन्द पोखरेलले बताए ।
‘अन्तर्राष्ट्रियस्तरको अति विशिष्ट उडानको पूर्व जानकारी हुँदाहुँदै गैर जिम्मेवारीपूर्वक लापरवाही गरेको पाइएकोले उल्लिखित विषयमा छानवीन गरी ७ दिनभित्र प्रतिवेदन पेश गर्न छानवीन समिति गठन गरिएको छ’मन्त्रालयले जारी गरेको विज्ञप्तिमा भनिएको छ ।
१३ फागुन २०७२
वि.सं.२०७२ फागुन १३ बिहीवार २०:०९ मा प्रकाशित
