काठमाडौं । डा. बाबुराम भट्टराई नेतृत्वको नयाँ शक्तिले आज एक पत्रकार सम्मेलन गर्दै काठमाण्डौं शहरलाई सफा र हराभरा बनाउन हरेक हप्ता शहरलाई बढार्ने बताएका छन् । यसका लागि नयाँ अभियानका संयोजक डा. भट्टराईसहित केन्द्रीय सचिवालय सदस्यहरु, युवा, विद्यार्थी, मजदुर, किसानहरुको सहभागिता गरिने जानकारी दिइएकोछ ।
आज एक पत्रकार सम्मेलनको आयोजना गर्दै भट्टराईले उक्त कुरा बताएका हुन् । हरियो काठमाण्डौं सफा काठमाण्डौंका साथ साथै नेपाली उत्पादनलाई प्राथमिकता दिने, भ्रष्टाचार बिरुद्ध हेल्प डेस्क स्थापना गर्ने, राष्ट्रिय र सामाजिक सद्भावका लागि अभियान थाल्ने र महिला बिरुद्ध हिंसामा शुन्य सहनशीलता अभियान थाल्ने कार्यक्रम आफ्नो पार्टीको रहेको पनि जानकारी दिएका छन् ।
पत्रकार सम्मेलनमा नयाँ शक्ति नेपालले एक आर्थिक वर्षमा एक व्यक्तिबाट ५० हजार रुपैयाँभन्दा धेरै चन्दा नलिने पनि बताइएकोछ । साथै कुनै संस्था, फर्म र कम्पनीबाट भने एक आर्थिक वर्षमा २० लाख रुपैयाँभन्दा धेरै चन्दा नलिने जनाएको छ । पार्टी सदस्यता शुल्क भने एक सय रुपैयाँ तोकिएको छ ।
१८ फागुन २०७२, ४.३०
वि.सं.२०७२ फागुन १८ मंगलवार १६:५२ मा प्रकाशित
