रसिला होमागाई
भक्तपुर । जिल्ला विकास समिति भक्तपुरले २८ औं जिल्ला परिषदको निर्णय शुक्रबार एक कार्यक्रमको आयोजना गरेर सार्वजनीक गरेको छ ।
आ.व २०७३/७४ का लागि जिल्ला विकास समिति भक्तपुरको कुल बजेट रु २ अर्ब ८७ करोड ५६ लाख ३६ हजार हुने भएको छ ।
जिविसद्वारा आयोजित २७ औँ जिल्ला परिषद्को निर्णय सार्वजनिकीकरणमा कुल बजेटमध्ये आन्तरिक आयतर्फ रु ५ करोड ११ लाख १६ हजार रहेको स्थानीय विकास अधिकारी ध्रुवप्रसाद कोइरालाले बताए । नेपाल सरकारबाट प्राप्त अनुदान रु १९ करोड २९ लाख ४३ हजार रहेको छ ।
कुल बजेटमध्ये चालुतर्फ रु ३ करोड ३६ लाख १७ हजार र पुँजीगततर्फ रु २१ करोड ४ लाख ९९ हजार प्रस्ताव गरिएको छ । प्रस्तावित बजेटको १३ दशमलव ७७ प्रतिशत चालु बजेट र ८६ दशमलव २३ प्रतिशत पुँजीगत बजेट रहेको स्थानीय विकास अधिकारी कोइरालाले जानकारी दिएका छन् ।
यसैगरी, आव २०७३÷७४ को बजेट तर्जुमा गर्दा विभिन्न क्षेत्रलाई प्राथमिकता दिएको छ । उक्त बजेटले भूकम्पपछिको पुनःनिर्माण, विपद् न्यूनीकरण, कृषि क्षेत्रमा हुने विषादी प्रयोग शुन्य लगायतका विभिन्न योजना बजेटको प्राथमिकता रहेको छ ।
२१ फागुन २०७२ / ५:४५
वि.सं.२०७२ फागुन २१ शुक्रवार १८:३५ मा प्रकाशित
