काठमाण्डौं । उत्तर कोरियाले अमेरिका र दक्षिण कोरियाविरुद्ध आणविक आक्रमण गर्ने चेतावनी दिएको छ । यी दुई देशले संयुक्त रुपमा थालेको सैन्य अभ्यास नरोके यस्तो आक्रमण गर्ने उत्तर कोरियाले बताएको हो ।
पछिल्ला केही वर्षदेखि भइरहेको संयुक्त अभ्यासमा यस वर्ष ३० हजार सैनिक सहभागी भएको र यो अहिलेसम्मकै ठूलो भएको बताइएको छ । यो अभ्यासलाई उत्तर कोरियाले आफूविरुद्ध हस्तक्षेपको पूर्वाभ्यासका रुपमा व्याख्या गरेको छ ।
तर, उत्तर कोरियाले यस्तो धम्की र चेतावनी दिएको यो पहिलोपटक भने होइन । गत वर्ष पनि उत्तरले अभ्यास नरोके अमेरिकाको राजधानी वासिङटन डिसीलाई ‘आगोको समुद्र’मा परिणत गरिदिने बताएको थियो ।
उत्तरको चेतावनीको जवाफमा दक्षिण कोरियाले यस्ता उत्तेजनात्मक टिप्पणीहरु नगर्न आग्रह गरेको छ । ‘यदि उसको हरकत यस्तै रहिरह्यो भने हाम्रा सैनिक जवाफ दिन बाध्य हुनेछन्,’ दक्षिण कोरियाले अधिकारीले बताएका छन् ।
प्रकाशितः २०७२ फाल्गुन २४
वि.सं.२०७२ फागुन २४ सोमवार १२:३४ मा प्रकाशित
