पोखरा । प्रधानमन्त्री केपी शर्मा ओलीले दक्षिण एसियाका जनताको प्रगति, समृद्धि र कल्याणका लागि दक्षिण एसियाली क्षेत्रीय सहयोग सङ्गठन (सार्क)का आदर्श, सिद्धान्त र उद्देश्यप्रति नेपालको पूर्ण प्रतिबद्धता रहेको बताएका छन् ।
सार्क मन्त्रिपरिषद्को ३७औँ बैठकको उद्घाटन गर्दै ओलीले दक्षिण एसियाली पहिचान र यस क्षेत्रका जनताको उन्नयनलाई केन्द्रमा राखेर सार्कको जीवन्त भावनालाई अक्षुण्ण राख्न सबै सदस्य मुलुकलाई आग्रह गरे ।
प्रधानमन्त्रीले दक्षिण एसियाको सफलता, यसको समुज्वल भविष्यका निम्ति बिलम्ब गर्ने बेला छैन भन्दै अब आर्थिक विकासका सम्भावनालाई अघि बढाउन सामूहिक रुपमा काम गर्नुपर्नेमा जोड दिए । ‘विश्व मामिलामा अग्रपङ्क्तिमा रहेर दक्षिण एसियाले नेतृत्व गर्नुपर्छ ।’ उनले भने ।
विश्वले दक्षिण एसियाको सामथ्र्य र सम्भावना, हाम्रा प्रयास र आकाङ्क्षालाई उत्सुकताका साथ निरन्तर नियालिरहेको चर्चा गर्दै प्रधानमन्त्रीले यस भेगको गरिमाका निम्ति दृढताका साथ काम गर्नुपर्ने बताए ।
‘‘स्रोत र साधनले भरिपूर्ण भएर पनि चौतर्फी विकासमा दक्षिण एसिया पछि परेको छ । यस क्षेत्रको विकास प्रगति उत्साहजनक छैन । दिगो विकासको प्रचुर सम्भावना रहेको यस भेगलाई आधुनिक प्रविधिको उपयोग गर्दै विश्वको आर्थिक केन्द्र बनाउन सकिन्छ ।’ उनले भने ।
४ चैत २०७२, ३:२३
वि.सं.२०७२ चैत ४ बिहीवार १५:०७ मा प्रकाशित
