काठमाण्डौं । फ्लोरिकल्चर एसोसिएसन नेपाल(फ्यान) यही चैत १८ गतेदेखि १९ औं पुष्प व्यापारमेला (फ्लोरा एक्स्पो) आयोजना गर्ने भएको छ । स्वच्छ वातावरण र आर्थिक सम्मृद्धिका लागि पुष्प व्यवसाय भन्ने मूल नाराका साथ पुष्प मेला आयोजना गर्न लागिएको हो ।
चारदिने मेलामा कुल ६४ वटा स्टलमध्ये अफिसियल स्टलका लागि ६, प्रतियोगितात्मक प्रदर्शनीका लागि तीन, ल्याण्डस्केपिङका लागि चार वटा र व्यवसायिक स्टलका लागि ५१ वटा स्टल छुट्याइएको आयोजकले आइतबार राजधानीमा पत्रकार सम्मेलन गरी जानकारी दिएको छ ।
मेलामा मौसमी फूल, आलंकारिक बोट बिरुवा, कटफ्लावर, ड्राइफ्लावर, सुनाखरी, कम्पोष्ट मल, फूलको गानो, विउ विजन, कृषि औजार, उपकरण, प्याकेजिङका सामाग्री, सुक्ष्म तथा थोपा सिचाई प्रविधि र विषादीको प्रदर्शनी तथा बिक्रीको व्यवस्था गरिएको छ ।
हाल नेपालमा १४१ हेक्टरमा पुष्प खेती हुँदै आएको छ । आव २०७१/७२ मा सिजनल फूल बिरुवातर्फ २२ करोड, आलंकारिक बोट बिरुवातर्फ ४० करोड, कटफ्लावर्सतर्फ २१ करोड, ल्याण्डस्केप तथा गार्डेनिङ्गतर्फ १७ करोड, खुल्ला फूलतर्फ सात करोड र निर्याततर्फ तीन करोड गरी कुल एक अर्व ३४ करोडभन्दा बढीको कारोबार भएको फयानले जनाएको छ। आब २०७१/७२ मा १० करोडको फूल तथा पुष्पजन्य बस्तुको आयात भएको छ ।
मेलामा सहभागि विभिन्न पुष्प व्यवसायीद्वारा उत्पादित फूल बिरुवाबीच प्रतिस्पर्धा गराई विभिन्न विधामा प्रथम हुनेलाई नगद, सिल्ड तथा प्रमाणपत्रद्वारा पुरस्कृत गरिने फयानका कार्यवाहक अध्यक्ष तथा मेला संयोजक दिलिप वादेले जानकारी दिए ।
१५ चैत २०७२, ८.००
वि.सं.२०७२ चैत १५ सोमवार ११:०९ मा प्रकाशित
