![[अपडेट] खोटाङ बस दुर्घटनामा मृत्यु हुनेको संख्या २४ पुग्यो ( हेर्नुहोस् नामसहित)](https://www.arthatantra.com/wp-content/uploads/2016/04/khotang.jpg "[अपडेट] खोटाङ बस दुर्घटनामा मृत्यु हुनेको संख्या २४ पुग्यो ( हेर्नुहोस् नामसहित)")
काठमाण्डौं । खोटाङबाट काठमाडौंका लागि छुटेको यात्रुबाहक बस दुर्घटना हुँदा मृत्यु हुनेको संख्या २४ जना पुगेको छ ।
मृत्यु हुनेमध्ये गाडी चालक पर्साका अर्जुन उप्रेती, खोटाङ दिक्तेल नगरपालिका–१४ का सन्तोश कट्वाल, च्यास्मिटार–८ का सुरेन्द्रकुमार राई, च्यास्मिटारकै रविन राई, निर्मलीडाँडा–३ की विमला राई, डिकुवा–८ का मोजा राई, याम्खा–७ का भैरव राई, खार्मी–५ का मित्राकुमार राई, दिप्सुङ–४ का गोविन्द तिम्सिना, उदयपुर बास्बोटे–३ का बबिन राई, उदयपुर ठोना–३ का हेम सुनार, धादीनारायण श्रेष्ठ, उदयपुर ताम्लिछा–५ की शान्ता राई, ओमश्री राई, सोलुखुम्बुका सोम सुन्दास र सुस्मा राईको सनाखत भएको सशस्त्र प्रहरी हलेसी गुल्मका निरीक्षक फुर्गेली शेर्पाले बताए । अन्यको सनाखत हुन सकेको छैन । मृतक शव पोष्टमार्टमका लागि जिल्ला अस्पताल दिक्तेल ल्याइँदै छ ।
दिक्तेलबाट काठमाडौं गइरहेको बा २ ख ६३७६ नम्बरको बस दुर्घटना हुदा ड्राइभर अर्जुन उप्रेती लगायत २४ जनाको मृत्यु भइसकेको उद्धारमा संलग्न सशस्त्र प्रहरी निरीक्षक शेर्पाले बताए ।
अन्य २३ जनालाई हलेसीस्थित स्वास्थ्य चौकीमा प्राथमिक उपचारपछि थप उपचारका लागि सेनाको हेलिकप्टरबाट काठमाडौं लगिएको छ ।
दिक्तेलबाट १८ जना यात्रु बोकेको बसले बाटोमा थप्दै लगेकाले कति यात्रु सवार थिए भन्ने अझै खुल्न नसकेको प्रहरीले जनाएको छ । घटनास्थलमा नेपाल सेना, सशस्त्र र जनपथले मृतक र घाइतेको खोजी गरी उद्धार गरिरहेका छन् ।
प्रकाशितः २०७२ चैत्र ३०
वि.सं.२०७२ चैत ३० मंगलवार ११:०६ मा प्रकाशित
