काठमाण्डौं । राउण्ड अन्नपूर्ण पदमार्ग अन्तर्गत थोराङपासमा अस्थायी सेल्टर (आवास गृह) निर्माण भएपछि पर्यटकलाई सहज भएको छ।
जिल्ला विकास समिति मुस्ताङ र पर्यटन बोर्डको रु. ४० लाखको लगानीमा सेल्टर निर्माण गरिएको हो। एक्काइस दिन लाग्ने पदमार्गको पदयात्रामा आउने अधिकाँश पदयात्री समुद्री सतहदेखि ५ हजार ४ सय मिटर उचाइमा रहेको थोराङपासमा पुग्न चाहान्छन्।
जिल्ला विकास समितिका कार्यक्रम अधिकृत केदारसिंह थापाले मनाङ र मुस्ताङको सिमानामा पर्ने थोराङ क्षेत्रमा आवश्यकताको आधारमा २ वटा सेल्टर निर्माण गरिएपछि यो सिजनमा आउने पदयात्रीलाई सहज भएको जानकारी दिए।
लामो समयदेखि सेल्टर निर्माण गर्नुपर्ने बहस चले पनि प्रक्रिया अघि नबढ्दा उक्त समयमा ठूलो मानवीय क्षति भएको थियो। अहिले सेल्टर बनेपछि हिमपातकै कारणले यस्तो मानवीय क्षति नहुने (एक्याप) का पर्यटन सहायक बेलबहादुर पुनले जानकारी दिए।
बोर्ड तथा मन्त्रालयले पक्की घर नै बनाउन भनेर बजेट दिएको भए पनि तत्काल सम्भव नभएका कारण टिन र फलामको सहायताले अस्थायी आवासगृह निर्माण गरिएको जिविसले जनाएको छ ।
प्रकाशितः २०७३ वैशाख ४
वि.सं.२०७३ वैशाख ४ शनिवार १४:२१ मा प्रकाशित
