काठमाण्डौं । बजारमा सोल्टी होटलले बोनस वितरण गरेर नै पूँजी बढाउने हल्ला चलेको भए पनि होटलले त्यस्तो नभएको भन्दै बजारमा चलाइएको हल्ला निराधार भएको जनाएको छ । यो जानकारीसँगै हिजो आइतबार सेयर बजारमा सोल्टी होटलको सेयर किन्ने लगानीकर्ताहरु नराम्ररी झुक्किन पुगेका छन् ।
नेप्सेमा अत्यन्त भारी अन्तरको गिरावट आइरहेका बेला हिजो आइतबार लगानीकर्ताहरु पूर्ण रुपमा सोल्टी होटलको सेयर प्रति आकर्षित हुँदा प्रतिकित्ता शेयर मुल्य झण्डै १० प्रतिशतले बढ्न पुगेको थियो । प्रतिकित्ता १० रुपैंया अंकित मुल्य रहेको होटलको शेयर मुल्य बोनस बितरणको समाचार केही सञ्चार माध्यममा आए पछि एकाएक बढ्दा ३५ रुपैंयाले माथि चढेर ३ सय ९२ रुपैंया पुगेको थियो ।
विदेशी लगानी समेत रहेको होटलले त्यसरी प्रकाशित समाचार होटलको योजना अनुरुप नभएको भन्दै आज नेप्सेलाई एक पत्र मार्फत् जानकारी गराएकोछ । आर्थिक वर्ष २०७१/७२ को अन्तिममा होटलको शेयर पूँजी १ अर्ब ५० करोड रहेको र त्यसमा कुनै परिवर्तन नभएको होटलले प्रष्ट पारेको छ ।
उसले स्थिर पूँजी र चालु पूँजी गरि कुल २ अर्ब ९० करोड ५६ लाख ७ हजार रुपैंया स्थिर पूँजी रहेको र विदेशी लगानी रहेकाले उद्योग विभागबाट स्वीकृति लिनुपर्ने बताएको छ । होटलमा होलिडे इन्स इन्भेष्टमेण्ट नेपाल लिमिटेड हकंकगंको १० प्रतिशत लगानी रहेको छ ।
२४ जेठ २०७३, १२.००
वि.सं.२०७३ जेठ २४ सोमवार १३:०७ मा प्रकाशित