चितवन । चितवन राष्ट्रिय निकुञ्जमा चालु आवको ११ महिनामा ८२ हजार पर्यटक आएका छन् । उनीहरुबाट झन्डै १२ करोड राजस्व सङ्कलन भएको निकुञ्जले आज जनाएको छ ।
सबैभन्दा बढी प्रवेश शुल्कबाट राजस्व सङ्कलन भएको निकुञ्जका रेन्जर ऋषिराम ढकालले जानकारी दिए ।
उनका अनुसार गएको साउन महिनादेखि जेठसम्मको तथ्याङ्कअनुसार निकुञ्जमा ८१ हजार ८१३ जना पर्यटक प्रवेश गरेका छन् । पर्यटकबाट ११ करोड ९३ लाख ६७ हजार २७३ रुपैयाँ राजस्व सङ्कलन भएको छ ।
निकुञ्ज घुम्नेमा ४२ हजार १५१ जना पुरुष र ३९ हजार ६६२ जना महिला पर्यटक छन् । सबैभन्दा बढी सौराहा क्षेत्रबाट पर्यटक निकुञ्ज प्रवेश गरेको पाइएको ढकालले जानकारी दिए। आठ करोडभन्दा बढी राजस्व प्रवेश शुल्कबाट मात्रै उठेको छ।
चैत महिनामा सबैभन्दा बढी एक करोड ८६ लाख ४४ हजार बढी राजस्व सङ्कलन भएको छ।
अघिल्लो वर्ष भूकम्पपछिको समयमा निकुञ्जमा पर्यटक शून्य जस्तै भए पनि यो आवमा भने बढेको पाइएको निकुञ्जले जनाएको छ ।
प्रकाशितः २०७३ असार ६
वि.सं.२०७३ असार ६ सोमवार ११:०४ मा प्रकाशित
