काठमाण्डौं । सरकारले अफगानिस्तानको काबुलमा भएको आतंकवादी आक्रमणमा ज्यान गुमाएका नेपाली सुरक्षागार्डको परिवारलाई १० लाख रुपैयाँ क्षतिपूर्ति दिने तयारी गरेको छ । यसका साथै, त्यहाँ रहेर काम गरिरहेका नेपालीहरु फर्किन चाहेमा उनीहरुलाई उद्दार गरिने पनि बताएकोछ ।
काबुलमा मारिएकाको शव लिन गएको चार्टर विमान मै बुधबार २४ नेपाली कामदार पनि स्वदेश फर्किएका थिए । काबुल घटनामा ज्यान गुमाएका सबैका परिवारप्रति सरकार संदेशनशील रहेको भन्दै सरकारले घटनामा मारिएका कामदार अवैधानिक भएपनि बीमाबापतको १० लाख रुपैयाँ क्षतिपूर्ति दिइनेछ । यसका लागि वैदेशिक रोजगार प्रवर्द्धन बोर्डले विशेष निर्णय गरेर मन्त्रिपरिषद्ले अनुमोदन गर्नु पर्नेहुन्छ ।
सोमबार काबुलमा भएको आतंकवादी आक्रमणमा १३ नेपालीको मृत्यु भएको छ । १२ जनाको घटनास्थलमै मृत्यु भएको थियो भने एकको उपचारका क्रममा बुधबार निधन भएको छ । घटनामा घाइते भएका पाँच जनाको भारतमा र एकको अफगानिस्तानकै अस्पतालमा उपचार भइरहेको छ ।
९ असार २०७३, ३।००
वि.सं.२०७३ असार ९ बिहीवार १५:३७ मा प्रकाशित
