काठमाण्डौं । मध्यपश्चिमका निर्माण व्यवसायीहरुलाई सम्झौता व्यवस्थापन, कर प्रणाली तथा खरीद व्यवस्थापनका बारेमा एक दिने तालिम दिइएको छ । नेपाल निर्माण व्यवसायी महासंघको आयोजना र अनुसन्धान तथा विकास तालिम समितिको व्यवस्थापनमा ४० जना निर्माण व्यवसायीहरुलाई विहिवार नेपालगञ्जमा तालिम दिइएको हो ।
सो अवसरमा नेपाल निर्माण व्यवसायी महासंघका उपाध्यक्ष रुद्र शर्माले महाभूकम्प तथा भारतीय नाकाबन्दीका कारण निर्माण व्यवसाय चौपट भएकाले व्यवसायीहरुका समस्याप्रति संवेदनशील भईदिन सबैसँग आग्रह गरेका थिए । निर्माण व्यवसाय समृद्ध नभए सम्म मुलुकको विकास असम्भव भएको शर्माले बताए ।
सहभागी व्यवसायीहरुलाई एशियाली विकास बैंकका प्रतिनिधि भीम खतिवडा, आन्तरिक राजस्व कार्यालय, नेपालगंजका प्रमुख कर अधिकृत नारायणप्रसाद सुवेदी, प्राविधिक शिक्षा तथा व्यवसायीक तालिम परिषद्का सदस्य सचिव डा. रामहरी लामिछाने र नेपाल निर्माण व्यवसायी महासंघका कानुनी सल्लाहकार बाबुराम दाहालले प्रशिक्षण दिएका थिए ।
कार्यक्रममा महासंघका महासचिव रामशरण देउजा, उपमहासचिव सुर्य प्रसाद तिमल्सिना, सहकोषाध्यक्ष नरहरी थपलिया, मध्य पश्चिमाञ्चल क्षेत्रीय निर्माण व्यवसायी संघका अध्यक्ष मोहन प्रकाश आचार्य लगायतको उपस्थिति थियो ।
३० असा २०७३, ४।००
वि.सं.२०७३ असार ३० बिहीवार १५:५० मा प्रकाशित
