काठमाण्डौं । प्रधानमन्त्री केपी शर्मा ओलीले आज बिहान सभामुख ओनसरी घर्तीलाई आफ्नै निवास बालुवाटारमा बोलाएर बजेट पास गर्ने कार्यसूची रोकिएकोमा प्रश्न गरेका छन् । ‘असार मसान्तसम्म पास गर्नेुपर्ने बजेट विधेयकको कार्यसूचीमा सभामुखले हस्तक्षेप गरेर मिचेको’ उनले आरोप लगाएका छन् ।
सभामुखलाई उनले नियमसंगत तरिकाले पहिले बजेट पास गरेर मात्रै अविश्वासको प्रस्तावमा जानुपर्ने बारे अवगत गराएको प्रधानमन्त्रीका प्रेस संयोजक चेतन अधिकारीले बताए। प्रधानमन्त्रीले संसदीय परम्परा, अभ्यास र सभामुख पदको मर्यादालाई ध्यान दिई बजेटसम्बन्धी कार्यसूचीलाई प्राथमिकतामा राख्न आग्रह गरेको अधिकारीले जानकारी दिए।
सभामुख घर्तीले दलहरुबीच सहमति नभएको भन्दै बजेटका आश्रित तीन विधेयक पास गर्ने कार्यसूची रहे पनि सूचना टाँस गरेर बैठक स्थगित गर्दै साउन ६ गते अविश्वास प्रस्तावमाथि छलफल गर्ने कार्यसूची सार्वजनिक गरेकी थिइन्। अहिले उनले प्रधानमन्त्री समक्ष सबैको सहमति जुटाउन परामर्श गरिने बताएकी थिइन्।
असार २९ गते आर्थिक विधेयक, २०७३, राष्ट्र ऋण उठाउने विधेयक २०७३ र ऋण तथा जमानत एक्काइसौं संशोधन विधेयक २०७३ माथि छलफल गर्ने कार्यसूची थियो । तर, माओवादी केन्द्र र कांग्रेस सहितका दलले संसदमा अविश्वासको प्रस्ताव दर्ता गराएपछि संसद बैठक बस्न सकेको छैन।
४ साउन २०७३, ११।००
वि.सं.२०७३ साउन ४ मंगलवार १२:२७ मा प्रकाशित