काठमाण्डौं । भारतको उत्तर प्रदेशमा बादरले मान्छेसँग लुटपाट गरेको एउटा घटना घटेको छ।
उत्तर प्रदेशको मथुरा नजिकै रहेको हाथरसमा एउटा बादरले शनिवार एकजना ब्यापारीको ३ लाख रुपियाँ लुटेको छ। स्थानीयबासीले बादरलाई लामो समय लखेटेका थिए। लामो प्रयासपछि बादरले लुटेको रकम त फर्कायो तर ऊबाट पौने तीन लाख रुपियाँ मात्र बरामद भएको बताइएको छ।
सासनीको एउटा गाउँमा बसोबास गर्ने शैलेश वार्ष्णेयको नानऊ रोडमा हिन्दुस्तान युनिलीवर लिमिटेडको दोकान छ। यहाँ स्थानीयवासीहरू दैनिक खाध्यान्यलगायतका सामान किनमेल गर्न आउने गर्दछन्। लुटपाट भएको दिन शैलेशको दोकानमा एक व्यापारी तीन लाख रुपियाँको थैला बोकेर आएका थिए। उनी पैसाको थैला आफू नजिक राखेर अरु सामान किन्न व्यस्त थिए। त्यसैबेला एउटा बादर भित्र छिरेर उनको पैसाको थैला घिस्याउँदै त्यहाँबाट गायब भएको थियो।
बादरलाई समात्न गाउँका धेरै व्यक्ति पछाडि लागेका थिए। बादरले लामो समय सवैलाई छक्याएपछि अन्त्यमा पैसाको थैला एउटा घरको छतमा छोडेर भागेको थियो। पछि त्यो थैला व्यापारीलाई फिर्ता गर्दा त्यसमा २५ हजार रुपियाँ कम थियो। अहिले गाउँमा यही विषयलाई लिएर चर्चा भइरहेको छ, थैलाबाट गायब भएको २५ हजार रुपियाँ बादरले लिएर गयो कि बादर धपाउन सक्रिय व्यक्तिहरूले ?
प्रकाशितः २०७३ साउन १७
वि.सं.२०७३ साउन १७ सोमवार १४:३० मा प्रकाशित