काठमाण्डौं । कर्मचारी सञ्चय कोषका सञ्चयकर्ताले घर निर्माणका लागि एक करोड रुपैयाँसम्म कर्जा पाउने भएका छन् भने बार्षिक साढे ८ प्रतिशत ब्याजमा कर्मचारीहरुले २० बर्षसम्म भुक्तानी गर्न मिल्नेगरी घर कर्जा पाउने भएका छन् ।
यो कर्जा साउनबाटै मिल्नेछ । साढे आठ प्रतिशतमा उपलब्ध हुने घर कर्जाको सीमा बढाइएको छ । १० बर्षको तलव बराबर घर कर्जा दिइँदै आएकोमा कोषले यसपालीबाट बढाएर १५ बर्ष पुर्याएको छ । यो हिसावले अब एक अधिकृतस्तरको सरकारी कर्मचारीले घर निर्माण गर्नका लागि ५६ लाख ६७ हजार ८४० रुपैयाँ ऋण पाउने छ ।
कोषको सञ्चयकर्ता रहेको निजी क्षेत्रको कर्मचारीले पनि यो सुविधा पाउने छ । कोषले घर कर्जा वढीमा एक करोड रुपैयाँ मात्र उपलब्ध गराउने छ । यो सुविधा नियमित एक बर्ष कोषकट्टी भएको र दुई बर्ष सेवा अवधि बाँकी रहेका सञ्चयकर्ताले पाउने छन् । यसअघि नियमित दुई बर्ष कोषकट्टी भएका सञ्चयकर्ताले मात्रै ऋण लिन पाउने व्यवस्था थियो ।
कोषमा कुल पाँच लाख २५ हजार सञ्चयकर्ता छन् । यसमध्ये एक लाख २५ हजार निजी क्षेत्रका कर्मचारीहरु छन् । बढिमा २० बर्षसम्म पाइने यो कर्जा अवकाश हुनुअघि भुक्तानी गर्ने व्यवस्था गरिएको छ ।
१७ साउन २०७३, ४।००
वि.सं.२०७३ साउन १७ सोमवार १५:५६ मा प्रकाशित