चितवन । नेकपा क्रान्तिकारी माओवादीका अध्यक्ष मोहन वैद्यले कांग्रेस र माओवादी समीकरणमा बनेको नयाँ सरकारले देश र जनताको पक्षमा काम गर्न नसक्ने दावी गरेका छन् । साथै, उनले अब पार्टीले माथिल्लो कर्णाली आयोजना र सुकुम्बासी समस्या समाधानका लागि छिट्टै राष्ट्रव्यापी आन्दोलन गर्ने बताएका छन् ।
माथिल्लो कर्णाली आयोजना देशकै लगानीमा बन्नुपर्ने भन्दै उनले भारतीय कम्पनीलाई जिम्मा दिएको बिरोधमा असोज २६ गते र सुकुम्बासी समस्या समाधानको माग गर्दै आउँदो भदौ १५ गते देशव्यापी आन्दोलन गर्ने वैद्यले जानकारी दिए ।
आज आइतबार बिहान चितवनको भरतपुरमा आयोजना गरिएको पत्रकार भेटघाटमा वैद्यले भने, ‘प्रचण्ड नेतृत्वको सरकार कसरी बन्यो भन्ने कुरा सबैलाई थाहा छ । यो सरकारले देश र जनताको हितमा काम गर्न नसक्ने ठोकुवा मेरो छ ।’ यद्यपी नयाँ सरकार भर्खरै बनेकाले यसको काम हेर्न बाँकी रहेको उनले बताए ।
२३ साउन २०७३, १।००
वि.सं.२०७३ साउन २३ आइतवार १३:४४ मा प्रकाशित
