काठमाडौं । नेपाली कामदारका लागि आकर्षक गन्तव्य मुलुक साउदी अरेबियाले बंगलादेशी कामदारमाथि लगाएको प्रतिबन्ध फुकुवा गरेको छ ।
विगत ६ वर्षदेखि बंगलादेशी कामदार लिन बन्द गरेको साउदीले पुनः बंगलादेशबाट आफ्नो मुलुकमा कामदार लिन लागेको हो ।
विभिन्न देशबाट गएका आप्रवासी कामदार घटाउँदै लैजाने नीतिका बीच बंगलादेशबाट कामदार लिने साउदीको यस निर्णयले नेपाली कामदारको माग हृवात्तै घट्न सक्ने सम्बन्धित व्यवसायीको भनाइ रहेको आजको राजधानी दैनिकमा समाचार छ ।
उनीहरुका अनुसार बंगलादेशी कामदार नेपाली कामदारभन्दा न्यून पारिश्रमिकमा खाडी जाने गरेका छन् । जसका कारण रोजगारदाता कम्पनीले बंगलादेशी कामदारलाई प्राथमिकता दिएमा नेपाली कामदारको माग निकै घट्न सक्ने ती व्यवसायीको भनाइ छ ।
नेपाल वैदेशिक रोजगार व्यवसायी संघका महासचिव रोहण गुरुङले बंगलादेशको यस निर्णयले अब नेपाली कामदारको माग ७५ प्रतिशतभन्दा बढीले घट्न सक्ने अनुमान गरिएको बताए ।
गत जुनमा बंगलादेशकी प्रधानमन्त्री शेख हसिना र साउदीका राजा शेख सलमानबीच भएको वार्तामा साउदी अरेबियाले बंगलादेशी कामदारलाई पुनः मौका दिने सहमति भएको थियो ।
प्रकाशितः २०७३ साउन ३१
वि.सं.२०७३ साउन ३१ सोमवार १०:०७ मा प्रकाशित
