नयाँ दिल्ली । भारतीय क्रिकेट टिमका प्रशिक्षक अनिल कुम्बलेको वार्षिक तलब ६ करोड २५ लाख भारतीय रुपैयाँ तय भएको छ ।
गत सोमबार भारतीय क्रिकेट बोर्ड (बिसिसीआई) को वित्तीय समितिको बैठकले कुम्बलेको तलब निर्धारण गरेको हो। कुम्बलेको तलब विगतमा भारतीय क्रिकेट टोलीलाई प्रशिक्षण दिएका प्रशिक्षकहरू भन्दा लगभग दोब्बर हो। भारतलाई सन् २०११ मा विश्व कप जिताएका दक्षिण अफ्रिकी प्रशिक्षक ग्यारी क्रिस्टन र उनीपछि नियुक्त भएका इङ्लिस प्रशिक्षक डङ्कन फ्लेचरको वार्षिक पारिश्रमिक ३ देखि ४ करोड रूपैयाँ मात्र रहेको बताइएको छ।
यद्धपि कुम्बलेको तलब भारतका अन्य प्रशिक्षकभन्दा बढी भएपनि रवि शास्त्रीको तुलनामा कम छ। बिसिसीआईका निर्देशक रहेका शास्त्रीको तलब ६ करोड ५० लाख तोकिएको छ। शास्त्रीको तलब कुम्बलेभन्दा २५ लाख बढी तोकिएको हो।
९ भदौ २०७३, ११।००
वि.सं.२०७३ भदौ ९ बिहीवार १६:०१ मा प्रकाशित