नेकपा (एमाले) संसदीय दलका उपनेता सुभाष नेम्वाङले प्रधानमन्त्री पुष्पकमल दाहालले बिहीबार संसदमा गरेको सम्बोधन संविधान र स्थापित मान्यता विपरित रहेको आरोप लगाएका छन् ।
विराटनगर विमानस्थलमा सञ्चारकर्मी सँग कुरा गर्दै नेम्वाङले नीति तथा कार्यक्रमको झल्को दिने गरी नयाँ कार्यक्रम ल्याउनु गलत भएको टिप्पणी गरे ।
नेम्वाङले यदि प्रधानमन्त्रीले नीति तथा कार्यक्रम ल्याएको हो भन्ने त्यसलाई प्रष्ट पार्नुपर्ने उल्लेख गरे । यसअघि आफै सहभागी भएको सरकारले ल्याएको नीति तथा कार्यक्रम र बजेट पारित भइसकेको अवस्थामा नयाँ कार्यक्रम ल्याउनु विधिसम्मत नभएकाले यसको जवाफ सरकारले दिनुपर्ने धारणा व्यक्त राखे ।
नेता नेम्वाङले मधेसी मोर्चाले उठाएको मागलाई सम्बोधन गर्ने कार्य देश र जनताको हित विपरीत देखिएकाले संविधान संशोधन आफुहरुलाई मान्य नहुने स्पष्ट पारे ।
उनले संविधानअनुसार बनेको स्थानीय निकाय पुनःसंरचना आयोगले दिएको खाकाअनुसार नै स्थानीय तहको निर्वाचन गराउनुपर्ने भनाई राखेका थिए ।
प्रकाशित मितिः २०७३ भदौ २४
वि.सं.२०७३ भदौ २४ शुक्रवार १६:४५ मा प्रकाशित
