काठमाडौ । नेपाल विद्युत् प्राधिकरणका कार्यकारी निर्देशक मुकेशराज काफ्लेले आफ्नो पदबाट राजीनामा दिएका छन् । प्रधानमन्त्री पुष्पकमल दाहाललाई सम्बोधन गरी उनले राजीनामा बुझाएका हुन् । विसं २०७१ मङ्सिर १३ गते प्राधिकरणको कार्यकारी प्रमुखमा नियुक्त भएका काफ्लेको कार्यकाल सकिन अझै तीन महिना बाँकी थियो । तर उनले पदबाट राजीनामा दिए ।
प्रधानमन्त्रीलाई सम्बोधन गरि बुझाइएको राजीनामापत्रमा उच्चस्तरीय राजनीतिक सहमति एवं पछिल्लो दिनमा देखिएको असहज अवस्थाका कारण आफूले पदबाट हट्ने निर्णय गरेको उल्लेख गरिएको छ ।
सो सम्बन्धमा प्रधानमन्त्रीका प्रेस सल्लाहकार गोविन्द आचार्यले काफ्लेले राजीनामा गरेको स्वीकार गरेका छन् । प्रधानमन्त्रीलाई बुझाइएको राजीनामापत्र ऊर्जा मन्त्रालयमा आइपुगेको ऊर्जामन्त्री जनार्दन शर्माले जानकारी दिएका छन् । नयाँ प्रक्रियामा आधारमा प्राधिकरणको नेतृत्व चयन गर्ने तयारीमा मन्त्रालय रहेको बुझिएको छ ।
प्रबन्ध निर्देशक काफ्लेसँग उर्जा मन्त्री जनार्दन शर्माले यस अघि नै पटक–पटक राजीनामा मागेका थिए । त्यसकारण राजनीतिक दबाबकै कारण उनले राजीनामा दिएका हुन् ।
यस अघिका उर्जामन्त्री टोप बहादुर रायमाझीले पनि काफ्लेलाई हटाउन चाहेका थिए । त्यस अघि राधा ज्ञवाली र काफ्लेबीच पनि मनमुटाव भएको थियो ।
प्रकाशित मितिः २०७३ भदौ २४
वि.सं.२०७३ भदौ २४ शुक्रवार २१:४२ मा प्रकाशित