काठमाण्डौं । यो साता नेपाल स्टक एक्सचेन्जमा तीन दिन मात्रै सेयर कारोबार भयो । साताको मंगलबार र विहीबार सार्वजनिक विदा परेकाले सेयर कारोबार भएन । गत साताभर नै ओरालो गतिमा रहेको सेयर बजारमा यो साता पनि खासै सुधार आउन सकेन ।
आइतबार नै ६.२४ अंकले घटेर लगानीकर्ताले निराशा भरिदिएको बजारले सोमबार १.८८ अंकको वृद्धि हासिल गर्यो । बुधबार बजार ३.५० अंकले घटेर १८१५.१९ अंकमा कायम भयो । गत साताको अन्तिम दिन नेप्से १८२३.०५ अंकमा थियो । यस आधारबाट हेर्दा, यो साता सेयर बजार ७.८६ अंकले घटेको देखिन्छ ।
साताको आइतबार एक अर्ब १७ करोड रुपैयाँभन्दा माथिको कारोबार भएको बजारमा सोमबार एक अर्ब १९ करोड रुपैयाँको कारोबार भयो भने बुधबार एक अर्ब ३७ करोड रुपैयाँभन्दा माथिको सेयर कारोबार भयो । समग्रमा साताभरमा तीन अर्ब ७४ करोड ८८ लाख १३ हजार नौ सय ६५ रुपैयाँ पुँजी परिचालन भयो ।
यो साता लक्ष्मी लघुवित्तका लगानीकर्ताले सबैभन्दा धेरै कमाए । यो साता लगानीकर्ताको आकर्षण बैंकिङ समूहमा नै रह्यो । सनराइज बैंक, एभरेष्ट बैंक, एनबी बैंक लगायतको राम्रो कारोबार भएको छ । बीमा समूहमा पनि लगानीकर्ताको राम्रो आकर्षण रहेको देखिन्छ । लुम्बिनी जेनेरल इन्स्योरेन्स, हिमालयन जेनेरल इन्स्योरेन्स, प्रभु इन्स्योरेन्स लगायतको धेरै कारोबार भएको छ । मुक्तिनाथ विकास बैंकको पनि राम्रो कारोबार भएको छ ।
प्रकाशितः २०७३ असोज १
वि.सं.२०७३ असोज १ शनिवार ११:१७ मा प्रकाशित
