काठमाण्डौं । भारतले आउँदो कात्तिक २४ र २५ गते पाकिस्तानको राजधानी इस्लामावादमा हुन लागेको सार्क सम्मेलनमा सहभागिता नजनाउने भएको छ । भारतले सम्मेलनमा सहभागिता नजनाउने निर्णय सार्क अध्यक्ष राष्ट्र नेपाललाई जानकारी गराएको हो । भारतको यस निर्णयलाई साथ दिँदै वंगलादेश, भुटान र अफगानिस्तानले पनि सम्मेलनमा भाग नलिने बताएका छन्।
अन्तरदेशीय आतंक र आन्तरिक मामिलामा हस्तक्षेपको कारण सम्मेलनमा सहभागिता जनाउन नसक्ने भारतीय विदेश मन्त्रालयका प्रवक्ता विकास स्वरुपले स्पष्ट गरेका हुन् । भारतीय विदेश मन्त्रालयले विज्ञप्ति जारी गर्दै भनेको छ – एउटा देशले तयार गरेको वातावरणका कारण इस्लामावादमा हुने सार्क सम्मेलनमा सहभागी हुने अवस्था रहेन । भारत यस क्षेत्रको सहयोग, सम्पर्क र सम्बन्ध प्रतिवद्ध छ। तर यी सबै विषय तबमात्र अगाडि बढ्न सक्छन् जब आतंकरहित स्वच्छ वातावरण हुन्छ।
१८ भारतीय सैनिकको ज्यान जाने गरी जम्मु र कास्मिरको उरीमा आतंकवादी हमला भएपछि भारत र पाकिस्तानको सम्बन्धमा थप चीसोपन आएको छ।पाकिस्तानले भने भारतले बहिस्कार गर्नुलाई दुर्भाग्यपूर्ण जनाएको छ।
१२ असोज २०७३, १२।००
वि.सं.२०७३ असोज १२ बुधवार १२:४१ मा प्रकाशित