काठमाडौँ । ट्रेकिंग एजेन्सिज एसोसिएसन अफ नेपाल (टान) र काठमान्डौ इन्भाईरन्मेन्टल एडुकेसन प्रोजेक्ट (किप) ले संयुक्त रुपमा लुक्ला र काठमाण्डौमा पदयात्रा सहयोगीहरुको लागि ‘क्लोथिंग सेन्टर’ संचालनमा ल्याउने भएकाछन् ।
यस सम्बन्धि समझदारीपत्रमा दुइ संस्थाले शुक्रबार एक कार्यक्रमका बिच हस्ताक्षर गरे | समझारीपत्रमा टानको तर्फबाट अध्यक्ष चन्द्रप्रसाद रिजाल र किपका अध्यक्ष बिमल नहर्कीले हस्ताक्षर गरे ।
यस्ता सेन्टरहरुले पदयात्रा सहयोगीहरुलाइ न्युनतम सफाई खर्च लिएर निशुल्क रुपमा तातो ज्याकेट, ट्राउजर, बुट लगायतका सामग्रीहरु उपलब्ध गराउनेछन् । पदयात्रा समापनपश्चात उक्त सामाग्रीहरु फिर्ता गर्नुपर्नेछ ।
किपले दुवै क्लोथीङ्ग सेन्टरहरुको ब्यबस्थापन हेर्नेछ भने टानले कर्मचारीहरुको तलब तथा घरभाडा व्यहोर्नेछ । साथै टानले लुक्ला स्थित आफ्नो बन्द भएको ‘क्लोथिंग सेन्टर’ मा भएका सम्पूर्ण सामग्री किपलाइ हस्तान्तरण गर्नेछ र आबश्यकता अनुसार नयाँ लुगा खरिद गर्नेछ ।
कार्यक्रममा बोल्दै टानका अध्यक्ष रिजालले यस्ता क्लोथिंग सेन्टरहरुले नेपालबारे विश्व पर्यटन बजारमा नेपालबारे सकारात्मक संदेश प्रबाह गर्ने बिश्वास लिए । “पुरा विश्वले थाहा पाउनेछन् कि हामीले हाम्रा कामदारहरुको उचित ख्याल राखेकाछौँ । यसले पयर्टन प्रबर्द्धनमा मद्दत पुर्याउनेछ,” रिजालले बताए ।
यस्ता क्लोथिंग सेन्टरहरुले आफुसंग न्यानो लुगा तथा जुत्ता नहुने तर उच्च हिमाली क्षेत्रमा काम गर्नुपर्ने हजारौं पदयात्रा सहयोगीहरुलाई सहयोग पुग्ने बिश्वास लिइएको छ ।
किपले पहिले देखि नै पदयात्रा सहयोगीहरुलाइ ठमेलस्थित आफ्नो कार्यालयबाट यस्तो सुबिधा प्रदान गर्दै आइरहेको छ । साथै अन्नपूर्ण क्षेत्रको लागि टान पोखराले यस्तो क्लोथिंग सेन्टर पोखरामा संचालनमा ल्याएको छ ।
असोज १४, २०७३
वि.सं.२०७३ असोज १४ शुक्रवार १६:११ मा प्रकाशित