लुम्बिनी । नेपाल यातायात स्वतन्त्र मजदुर संगठन लुम्बिनी अन्चल कमिटीले सडक दुर्घटना न्युनिकरण हाम्रो आफ्नै दायित्व भएको भन्दै मजदुरहरुलाई जागरुक पार्ने काम गरेका छन् ।
बुटवलमा एक अन्तक्रिया कार्यक्रम गरि स्थानिय प्रहरी प्रमुख, ट्राफिक प्रहरी प्रमुख यातायात व्यवस्था कार्यालयका प्रमुख, जिल्ला प्रशासन कार्यालयका प्रतिनिधि, स्थानिय राजनैतिक दलका प्रतिनिधि, यातायात व्यवसायी संघ संस्थाका प्रतिनिधि र नेपाल ट्रेड युनियन महासंघ(जिफन्ट) का प्रतिनिधि तथा यातायातका क्षेत्रका अगुवा तथा मजदुरलाई भेला गराई उक्त सचेतना कार्यक्रम गरिएको हो । कार्यक्रमको मजदुर संगठन जिफण्टका उपाध्यक्ष गोमा आचार्यले उद्घाटन गरिन् । कार्यक्रमको अध्यक्षता गरेका कृष्ण कंडेललेसडक दुर्घटनामा सवारी चालक वा अन्य मजदुरहरुले बहन गर्नुपर्ने जिम्मेवारीबारे कार्यपत्र प्रस्तुत गरेका थिए । उनले कार्यपत्रमार्फत सवारी प्रयोगकर्ता, सवारी चालक, यात्रुहरु र सवारीधनीले आ–आफ्नो स्थानबाट जिम्मेवार भएर सचेत बन्ने हो भने अधिकाँस दुर्घटना आँफैं हट्ने विषय राखेका थिएन ।
कार्यक्रमका विशेष अतिथी संगठनका उपाध्यक्ष अर्जुन अर्यालले कानुनलाइ कार्यान्वयन गर्ने पक्ष नै दुर्घटनाको कारणप्रति बेखवर बन्ने गरेका कारण निर्दोष मानिसहरुले अनाहकमा ज्यान गुमाउनुपर्ने र सजाय भोगी रहनु परेको आरोप लगाए । उनले भने, ʽकानुनका ठेली काखमा च्यापेर बस्ने अनि बजार हल्लाको पछाडी मात्रै दौडिने बानीले सोझालाइ सुलि र चोरलाइ चौतारोको उखान चरितार्थ भएको छ । प्रहरी प्रसाशनले कारबाही गर्छु भनेर सिकारिले बल्छी थापेर माछा कुरे जस्तो गर्ने हो भने मृत्यु दण्डको सजाय कानुनमा राखेपनी सवारी दुर्घटना कम हुदैन ।ʼ भौतिक पुर्वाधार बेगरको सडक, सडकमाथिको अतिक्रमण नहटेसम्म र सडक शान्ति क्षेत्र नबनेसम्म सडक दुर्घटना न्यूनिकरण नहुने उनले बताए ।
कायक्रममा सहभागीहरुले शैक्षिक योग्यताको प्रमाणपत्रले मोटर नचल्ने भन्दै पूर्व गृहमन्त्री माधव घिमिरेको शैक्षिक योग्यता नभएर घोप्टेभिरबाट गाडी खसेको हो भनेर प्रतिप्रश्न गरेका थिए । सरकारले एसएलसी पास भएकालाई मात्र भनेर ड्राईभर खोज्नु गलत भएको उनीहरुको टिप्पणी थियो ।
कार्यक्रममा अंचल सचिव रामचन्द्र बस्यालले सडकमा निर्माण सामाग्री थुपारेर सडक पुरै अवरुद्ध हँुदा चासो नराख्ने ट्राफिक प्रहरी र प्रसाशनले एउटा यात्रु ओराल्दा र चढाउँदा ड्राइभरको लाइसेन्स खोस्नु कहाँसम्म न्याय हो भनेर प्रश्न गरेका थिए ।
कार्यक्रममा सहभागी सरकारी निकायका पदाधिकारी र प्रहरी प्रशासनले सडक पूर्बाधार विकासमा समयमै ध्यान दिनुपर्नेमा जोड दिएका थिए ।
प्रकाशित मितिः २०७३ असोज १५
वि.सं.२०७३ असोज १५ शनिवार १३:०६ मा प्रकाशित
