रत्ननगर (चितवन), २८ असोज । गोरखा भूकम्पले क्षति पु¥याएको चितवनको पहाडी गाविस कविलासका ७० परिवार भूकम्पपीडितलाई घर बनाउन एक व्यक्तिले आर्थिक सङ्कलन गरेर रु २१ लाख सहयोग गर्नुभएको छ ।
चितवन शुक्रनगर स्थायी घर भई जर्मनीमा बस्दै आउनुभएका चितवन समाज जर्मनीका अध्यक्ष यज्ञराज सुवेदीमार्फत यहाँका ७० घर भूकम्पपीडितलाई रु २१ लाख रुपैयाँ सहयोग प्राप्त भएको गाविसका सचिव प्रद्युम्न खड्काले जानकारी दिए ।
सरकारबाट उपलब्ध भएको प्रतिपरिवार रु १५ हजार रकम र सुवेदीमार्फत आएको सहयोगबाट ट्रस्ट खडा गरेर यहाँका ७० भूकम्पपीडितको घर निर्माण गरिएको खड्काले जानकारी दिए । “प्रतिघर रु ४५ हजार सहयोग गरिएपनि बनाउन सक्नेले रु तीनलाखदेखि चारलाख लगानी गरेका छन्”, खड्काले भने, “नसक्नेले सामान्य बारबेर गरेरै भएपनि नयाँ घर बनाएका छन् ।”
उक्त गाविसमा भूकम्पका कारण १३५ घर पूर्ण क्षति भएका थिए । चितवनमा भूकम्पका कारण तीनहजार सातसय घर क्षति भएको तथ्याङ्क छ । सरकारले दिने भनेको अन्य रकम भने विभिन्न जिल्लामा वितरण हुँदा पनि चितवनमा कुनै प्रक्रिया सुरु हुन सकेको छैन ।
सुवेदीले सङ्कलन गरेको प्रतिपरिवार रु ३० हजार र सरकारका तर्फबाट प्रतिपरिवार रु १५ हजारका दरले आएको रकमबाट घर निर्माण भएको हो । भूकम्पपीडितलाई अहिले ती घर हस्तान्तरणसमेत भइरहेको कविलास गाविसले जनाएको छ ।
सुवेदीले कविलास गाविसमा भइपरी आउने घटनालाई सहयोग गर्नका निम्ति अक्षयकोष स्थापना गर्दै आगामी दिनमा पनि निरन्तर सहयोग जारी राख्ने प्रतिबद्धता जनाए ।
सोही क्षेत्रका सांसद कृष्णभक्त पोखरेलले विदेशमा रहेर पनि आफ्नै गाउँ ठाउँमा सहयोग गरेकोप्रति खुसी व्यक्त गरे । स्थानीय विकास अधिकारी श्रवणकुमार पोखरेलले विदेशमा पुनःनिर्माणका लागि सहयोग जुट्नु महत्वपूर्ण कुरा भएको बताए ।
वि.सं.२०७३ असोज २८ शुक्रवार १५:५६ मा प्रकाशित