काठमाण्डौं । चालु आर्थिक वर्षको पहिलो तीन महिनामा विभिन्न मुलुकबाट झन्डै १ अर्ब रुपैयाँको सुख्खा फलफूल (ड्राई फ्रुट्सं) आयात भएको छ । तिहारलाई लक्षित गर्दै व्यापारीले खरिद बढाएकाले साउनदेखि असोजसम्मै कुल वार्षिक आयातको एक तिहाइ ‘ड्राइ फ्रुट्स’ नेपाल भित्रिएको हो ।
भन्सार विभागको तीनमहिने तथ्यांकअनुसार साउनदेखि असोजसम्ममा ९५ करोड ५० लाख रुपैयाँ बराबरका ‘ड्राई फ्रुट्स’ आयात भएको छ । भाइटीकामा दिदी–बहिनीले दाजुभाइलाई टीका लगाएर सगुनका रूपमा दिने भएकाले यसलाई ‘‘भाइ मसला’ समेत भन्ने गर्छन् ।
तिहारमा ओखर, काजु, किसमिस, खजुर, नरिवल, सुपारी, बदाम, हाडे बदामलगायतका सुख्खा फलफूलको खपत धेरै हुने गर्छ । नेपालमा छिमेकी मुलुक भारत र चीनसहित बेलायत, इटाली, भियतनाम, यूएई, इन्डोनेसिया, पाकिस्तान, कतार, थाइल्यान्ड, अमेरिकालगायत मुलुकबाट यस्ता उत्पादन आयात हुने गरेका छन् ।
गत वर्ष विभिन्न मुलुकबाट करिब ३ करोड ६७ लाख किलो ‘ड्राई फ्रुट्स’ नेपाल भित्रिएको थियो । गत वर्ष सुख्खा र हरियो गरी करिब १० अर्ब ८२ करोड रुपैयाँ बराबरको फलफूल नेपालमा आयात भएको भन्सारको तथ्यांकमा उल्लेख छ ।
९ कार्तिक २०७३, कान्तिपुर, १२।००
वि.सं.२०७३ कात्तिक ९ मंगलवार १३:०० मा प्रकाशित
