मुस्ताङ। नेपालका ठूला सहरहरुमा धेरै ठाउँमा एउटै घरमा लाईनका लाईन बैंक तथा वित्तिय संस्थाको बोर्ड झुण्ड्याईएको हुन्छ । घरको शोभा नै कुरुप हुने गरि ती संस्थाहरुको बोर्ड देखिन्छ । तर नेपालकै यस्तो ठाउँ पनि छ जहाँ बैंक नभएर प्रशासनिक काम नै ठप्प हुन्छ । कुरो मुस्ताङ लोमान्थाङको हो ।
लोमान्थाङमा बैंक तथा वित्तीय संस्था नहुँदा इलाका प्रशासन कार्यालयले राहदानी जारी गर्न सकेको छैन । राहदानीका लागि आवश्यक पर्ने रकम जम्मा गर्ने बैंक नहुँदा उपल्लो मुस्ताङका ६ गाविसका सर्वसाधारण हप्तादिन लगाएर सदरमुकाम जोमसोम झर्नुपर्ने बाध्यता छ ।
असोज १ गतेदेखि इलाका प्रशासन कार्यालय स्थापना गरिए पनि राहदानीको काम गर्न नसकेको कार्यालय प्रमुख जितेन्द्र बलामीले जानकारी दिए । “यहाँ कुनै पनि बैंक तथा वित्तीय संस्था छैनन् । रकम जम्मा गर्ने व्यवस्था नहुँदासम्म त्यो काम गर्न सक्दैनौँ”, उनले भने । “यसका लागि सर्वसाधारण सदरमुकाममा नै जानुपर्छ ।”
इलाका प्रशासन कार्यालयबाट नागरिकता, विभिन्न सङ्घसंस्था दर्ता तथा नवीकरणका काम हुने भएपनि राहदानीका काम तत्काल स्थगित गरिएको प्रमुख बलामीले बताए ।
इलाका प्रशासन कार्यालयले एक महिनामा २२ वटा नेपाली नागरिकता प्रमाणपत्र वितरण गरेको जनाएको छ । राहदानीका लागि वैकल्पिक व्यवस्थाको तयारी भइरहेको प्रशासनको भनाइ छ ।
राहदानी बाहेकका अन्य सरकारी काम लोमान्थाङबाटै उपलब्ध हुने भएपछि लोमान्थाङ, छोसेर, छुसाङ, छोन्हुप, घमी र सुर्खाङ गाविसका करिब पाँच हजार सर्वसाधारण प्रत्यक्ष लाभान्वित भएका छन् ।
प्रकाशित मितिः २०७२ कार्तिक १८
वि.सं.२०७३ कात्तिक १८ बिहीवार ११:१७ मा प्रकाशित
