कन्चनपुर । भारु नोटको सटहीका विषयमा अन्यौलता कायम रहिरहेका बेला नेपाली काँग्रेसका सभापति शेरबहादुर देउवाले भारत सरकारले भारु पाँच सय र हजारको नोटमा लगाएको प्रतिबन्धका विषयमा प्रधानमन्त्री र नेपालका लागि भारतीय राजदूतसँग कुराकानी गर्ने बताएका छन् ।
पार्टी सभापतिमा निर्वाचित भएपछि पहिलो पटक कञ्चनपुर पुगेका देउवाले काँग्रेस कञ्चनपुरले भीमदत्तनगरमा अभिनन्दन गरेपछि भने–“नेपालमा रहेको भारु नोटका विषयमा म समस्या समाधानका लागि पहल गर्छु, भारतमा मजदुरी गरेका र सीमा क्षेत्रका जनतासित भएको नोटको व्यवस्थापन हुनु जरुरी छ ।” भारु नोटको व्यवस्थापन हुन नसके नेपाली अर्थतन्त्र प्रभावित हुने उनको भनाइ थियो ।
सभापति देउवाले स्थानीय तहको निर्वाचनका लागि एकताबद्ध भएर तयारी थाल्न कार्यकर्तालाई निर्देशन पनि दिए । “निर्वाचन गराउनु पनि संविधान कार्यान्वयन हो”, देउवाले भने–“यसका लागि तपाईँहरु तयार हुनुस् ।”
प्रकाशित मितिः २०७३ मंसिर ५
वि.सं.२०७३ मंसिर ५ आइतवार १३:४६ मा प्रकाशित