काठमाण्डौं । आज दिउँसो सेयर बजारमा हल्ला फैलियो– ‘मार्जिन लेन्डिङ अब ७० प्रतिशत पुग्दैछ ।’ तर यो हल्लामा भनिएको जस्तो केही नभएर आज अर्थमन्त्री कृष्ण बहादुर महरालाई भेट्न पुगेको टोलीले बजारमा थप तल जान नदिन मार्जिन लेन्डिङको सीमा बढाउने विषय सुझाएको मात्र बताइएकोछ ।
अर्थमन्त्रीले यस विषयलाई सकारात्मक रुपमा लिएको र गर्भनर चिरञ्जीवि नेपालसँग छलफल गर्ने भेट्न पुगेका सेयर लगानीकर्तासंघको टोलीलाई बताएका हुन् ।
मार्जिन लेन्डिङको सीमा नबढाए सेयरको घटेको मूल्यको आधारमा बैंकहरूले ऋण तिर्नका लागि मार्जिन कल गर्न थाल्ने र यसपछि सेयर बजार थप ओरालो लाग्ने सम्भावना रहेको संघको बुझाई छ ।
नेपाल राष्ट्र बैंकले मार्जिन लेन्डिङ ५० प्रतिशत कायम गरेको छ । अर्थमन्त्रीको भेटमा लगानीकर्ताले यसलाई बढाएर ७० प्रतिशतसम्म पुर्याउनुपर्ने माग गरेका थिए ।
१३ मंसिर २०७३, ३।४०
वि.सं.२०७३ मंसिर १३ सोमवार १५:५६ मा प्रकाशित
