काठमाण्डौं । नेपाल सरकारले २० बर्ष पुराना १२ हजार सार्वजनिक सवारी साधनहरुलाई पत्रु गर्ने भएको छ । यातायात ब्यवस्था बिभागले जारी गरेको सुचना अनुुसार बाग्मती अञ्चलको हकमा नामसारी भई दर्ता हुन आएका २० बर्ष पुगेका सम्पूर्ण सार्वजनिक सवारी साधनहरु आगामी फागुन १७ गतेभित्र पत्रु गरिसक्नुपर्ने भएको छ ।
सरकारले २०७१ फागुन १८ मा राजपत्रमा प्रकाशन गरी दुई बर्षभित्रमा २० बर्ष पुराना सार्वजनिक सवारी साधन नष्ट गरिसक्ने जनाएको थियो । त्यसैगरी २०७४ फागुन ३० भित्रमा भने देशभरिबाट यस्ता पुराना सार्वजनिक सवारी साधनहरु पत्रु गरिसक्नु पर्ने भएको छ ।
यातायात मन्त्रालयको समृद नेपालका लागि सडक, रेल तथा यातायात विकास पाँच वर्षे रणनीतिक कार्ययोजनामा उल्लेख भए बमोजिम बिस वर्ष भन्दा पुराना सम्पूर्ण सार्वजनिक सवारी साधनहरु तोकिएकै समयभित्र पत्रु गर्न, गराउन सम्बन्धित गाडी धनीहरुलाई सरकारले अपील गरेको छ ।
तोकिएको समयाबधि भित्र पत्रु नभईसकेका सवारी साधनहरुलाई नेपाल भर सञ्चालनमा रोक लगाईने र कही कतै सञ्चालन गरिएको भेटिएको खण्डमा त्यस्ता सवारी साधनहरुलाई जफत लगायत अन्य कानुनी कारबाही समेत गरिने चेतावनी सरकारले दिएको छ । यस्ता सवारी साधनहरुको जाँचपास, कागजात नविकरण बन्द भईसकेको छ ।
हाल नेपालमा अनुमानित ६०,००० को संख्यामा सार्वजनिक सवारी साधनहरु संचालनमा रहेकोमा १२,००० को संख्यामा २० वर्ष पुराना सवारी साधनहरु संचालनमा रहेको अनुमान गरिएको छ ।
२३ मंसिर २०७३, ११।००
वि.सं.२०७३ मंसिर २३ बिहीवार १६:५२ मा प्रकाशित
