काठमाण्डौं । नेपाली खेलकुदको सबैभन्दा ठूलो खेल मेला मानिने बृहत राष्ट्रिय खेलकुद प्रतियोगिताको सातौं संस्करण आगामी पुस ८ गतेदेखि पूर्वाञ्जलमा आयोजना हुने भएकोछ । प्रतियोगितामा २ सय ९४ स्वर्ण पदकका लागि भिडन्त हुने राष्ट्रिय खेलकुद परिषद्ले जानकारी दिएको छ।
परिषद्का अनुसार २ सय ९४ कै संख्यामा रजत र ४ सय ४७ कास्यका लागि कूल ४ हजार २८ महिला तथा पुरूष खेलाडीले प्रतिस्पर्धामा भाग लिदैछन्। यस प्रतियोगिता खेलाडी, प्रशिक्षक र पदाधिकारी गरि कूल ५ हजार ८ सय ९६ को हाराहारीमा सहभागी हुनेछन्। प्रतियोगिताको उद्घाटन ८ गते हुने भनिएपनि केही खेल पुस २ देखि नै सुरु हुने बताइएको छ।
प्रतियोगिता मोरङ, सुनसरी, सप्तरी, झापा, धनकुटा गरि पूर्वाञ्चलको ४ स्थानमा हुनेछ। सातौं राष्ट्रिय खेलकुदअन्तर्गत ३५ खेल सहभागी छन्। जसमा स्विमिङ, ट्रायथोलन र बडिबिल्डिङको स्पर्धा गत असोजमा काठमाडौंमै सम्पन्न भएको थियो। बाँकी ३० खेलको आयोजना पुस २ देखि सुरु हुनेछ।
रग्वी, डान्स स्पोर्ट्स, साम्बो, रक क्लाइम्बिङ र दोहोरी गरि ५ खेललाई प्रदर्शनीको रुपमा राखिएको छ। यस्तै, फेन्सिङ, गल्फ र स्नुकरको आयोजना भएपनि उनीहरूलाई पदक तालिकामा राखिएको छैन ।
२६ मंसिर २०७३, २।००
वि.सं.२०७३ मंसिर २६ आइतवार २०:०५ मा प्रकाशित
