काठमाण्डौँ । समता माइक्रो फाइनान्सले ९४ हजार ८०० कित्ता सेयर सर्वसाधारणका लागि खुला गरेको छ । १९ पुषमा बिक्री खुला हुने यो सेयर छिटोमा २२ गते र ढिलोमा माघ ४ गते बन्द हुने बताइएको छ।
कम्पनीको सेयर निस्कासन तथा बिक्री प्रबन्धक एनआइबिएल क्यापिटल रहेको छ। नेपाल इन्भेष्टमेन्ट बैंकका शाखाहरु, एनआइबिएल क्यापिटलको कार्यालय लाजिम्पाट, बारा स्थित माइक्रोफाइनान्सको कार्यालय लगायत बिभिन्न ११ संस्थामा सेयर आवेदन बुझाउन सकिने जनाइएको छ।
१०० रुपैयाँ अंकित मूल्यका सेयर न्युनतम ५० देखि अधिकतम ५०० कित्तासम्म आवेदन दिन पाइनेछ। एक हजार ८९६ कित्ता सेयर कर्मचारी र चार हजार ७४० कित्ता म्युचियल फण्डहरुलाई आरक्षित गरिएको जनाइएको छ।
बाराको सिमरामा प्रधान कार्यालय रहेको माइक्रोफाइनान्सको चुक्ता पूँजी हाल दुई करोड २१ लाख २० हजार रुपैयाँ रहेको छ। सर्वसाधारण सेयर बाँडफाँड पश्चात पूँजी तीन करोड १६ लाख रुपैयाँ पुग्नेछ।
१२ पुस २०७३, ८।००
वि.सं.२०७३ पुस १२ मंगलवार ०९:२४ मा प्रकाशित
