काठमाण्डौं । चलचित्र छक्कापन्जा पाइरेसीको अभियोग लागेका श्रीकृष्ण सुवेदीले आत्महत्या गरेका छन् । चितवनका सुवेदीले काठमाडौं महानगरपालिका ९ बिजयचोकमा भाडामा बस्दै आएका कोठामा आत्महत्या गरेको गौशाला प्रहरीले जनाएकोछ ।
कोठामा गलबन्दीले सिलिङ पंखाको हुकमा पासो लगाएर उनले आत्महत्या गरेको प्रहरीले जनाएको छ। केही समय अघि उनीसहित ४ जना लाई महानगरीय अपराध महाशाखाले पक्राउ समेत गरेको थियो। पछि दीपकराज गिरीले पक्राउ परेकालाई थुनामा नराख्न प्रहरीसँग आग्रह गरेपछि उनीहरु छुटेका थिए।
सुवेदीले सुसाइड नोट पनि लेखेका छन् । जसमा आफ्नो आत्महत्यामा कसैलाई दोष नदिनू भनिएको छ भने बैंकमा रहेको एक लाख रुपैयाँ बहिनीलाई दिनू भनिएको छ । तर, उनको सुसाइड नोटमा छक्का पन्जा पाइरेसीको आरोपबारे भने केही लेखिएको छैन ।
फेसबुकमा अर्जुनकुमार श्रेष्ठ नामको अकाउण्टबाट फिल्म अपलोड भएको थियो भने आजै चलचित्र युनिटले युट्युवबाट चलचित्र रिलिज गरेको थियो । १६ करोड बढिको कारोबार गरेको फिल्म नेपाली वक्सअफिसको सर्वाधिक सफल फिल्म हो।
२९ पुस २०७३, ३।००
वि.सं.२०७३ पुस २९ शुक्रवार १५:२९ मा प्रकाशित
